Vervatoxê Meclîsê Leşkerî yê Suryanîyan Matay Henayî derheqê hêrişanê îşxalî yê dewleta tirke yê vera Rojawanê Kurdîstanî de ANFyî rê qisey kerd.

Henayî ard ziwan ke hêrişî vera her beşê komelî yenê kerdene û vat: ''Şehba ra heta Dêrikî pêro şaristan û dewî û şarî dîyenê bombayan ver. Dewleta tirke hêrişê çimeyanê herême, binawanîye, dezgehanê xizmetî, îstasyonanê ceyran û petrolî, depoyanê genimî û merkezanê gazî kena. Netîceya hêrişan de embazê ma û hemwelatîyê ma şehîd bîyî. Dewê asûrî, suryanî û keldanîyan Girê Şeran, Rotan, Hertan, Girda Hor, Kabre, Hewere, Til Eşman, Til Cûma, Til Keyfçî, Til Tawirî û xeylêk dewê bînî dîyayî bombayan ver.''

Henayî vist vîrî ke dewleta tirke seba ke hêrişan rê bahane viraza Taksîmê Îstanbulî de teqayîşêk serûber kerdo û vat: ''Dewleta tirke wazena bi îşxalê Sûrîye cerganê sey DAÎŞ, El Nûsra herême de vila bikera. Dewleta tirke tim wazena aramîya şarê ma biherimna. Vera dewleta tirke ma do Rojawanî bipawê ke bi gonîya şehîdanê ma azad bîyo.''

Matay Henayî pare kerd ke sey Meclîsê Leşkerî yê Suryanîyan înan vera hêrişanê îşxalî amadekarîyê xo temam kerdî û vat: ''Seba vergirewtişê hêrişanê îşxalî yê dewleta tirke sey suryanîyan ma amadekarîyê xo temam kerdê. Ma do vera faşîzmê tirkan şer bikerê. Heta ke Efrîn, Girê Sipî, Serêkanîyê û herêmanê bînan ê Sûrîye bixelisnê ma do têkoşînî ra fek vera medê.''