Xelîl Ebdurrehmano ke birayê ci Mêrxas hêrişê PDKyî de şehîd bi, vat: ''Nê kurd nîyê. Ê xayîn ê ke dişmenî reyde xebitîyenê û merdimîye ra vejîyayî.'' Ebdurrehmanî venga her kesî da ke vera îxanetî tewir bigêro.
Keyeyê gerîlayanê rojawanijanê ke pê destê PDKyî ameyî qetilkerdene ANFyî rê qisey kenê.
Nûrî Xelo (Mêrxas) 1979 de Efrîn de dadîya xo ra bîyo. Mêrxasî domanîya xo ra nata waştêne bibo gerîla û axir wexto ke 14 serre bi verî tewrê xebatanê şorişî beno, 3 serran ra pey zî tewrê gerîlayan bi. Mêrxas wextêk Lubnan de perwerde vîneno, 1996-97 de derbazê Başûrê Kurdîstanî beno. Mêrxas 1997 de hêrişê PDKyî de pa 5 embazanê xo şehîd beno.
Kekê Mêrxasî Xelîl Ebdurrehmanî dîyar kerd ke birayê ci kesêko bihêz û jîhat bi û vat: ''O verê keye, merdiman û şarê xo de hîsger û wayîrerk bi. Tim waştêne hetkarîya her kesî bikero. Serranê 80an de keyeyê mi Apogîrî şinasnayî û ma nînan ra zaf hes kerdêne. Nûrîyî zî tim waştêne tewrê gerîlayan bibo û vatêne: 'Se beno wa bibo, ez do biba gerîla.' Wexto ke 14 serre bi tewrê xebatan bi û wexto ke 17-18 serre bi tewrê têkoşînî bi. Ey ma rê Lubnanî ra fotografî şawitî. Axir ey waştişê xo ard ca û bi gerîla. Têkoşîn û xîretê ey ma rê bîyî mîsal.
Wexto ke xebera şehadetê ey resaye mi, ez Heleb de bîya. Dadîya mi telefon de, pê bermayîşî vat ke Nûrî şehîd bîyo. A hele ez xo ra şîya. Birayê mi hetê xayînan û dişmenî ra kişîya. Dişmenî dima hêrişê şînê ma zî kerd û di kesî destbend kerdî. Lajê xala mi dima ma rê vat ke birayê mi û 5 embazê ci hetê PDKyî ra gêrîyayê binê ablûqa. Wexto ke birayê mi kerd şehîd vera PDKyî hêrsê ma zêdîya.
Eke PDK firsend bivîno ma zî kişeno. Ê merdimîye ra vejîyayî. Ê ewro zî hêrişê kurdan kenê la xo rê vanê kurd. Nê kurd nîyê, bîyê elemanê MÎT û dewleta tirke. Ganî kurdî vera nê xayînan wurzê payan ser. Ma pîya ganî verê înan bigêrê.''
