Berpirsê Çapemenîye yê QSDyî Ferhad Şamîyî derheqê gefanê dewleta tirke ya îşxalkere yê vera Rojawanî de ANFyî rê qisey kerd.

Şamîyî da zanayene ke hedefê dewleta tirke îşxalkerdişê pêro herême yo û seba ney vera bahaneyan afernena. Şamîyî vat: ''Tirkîya nêwazena Sûrîye de îstîkrarêkî aver şora û wazeba herême de tim şer est bo. Amadekarîya tewr pîle ya hêrişêkê neweyî na ya. Erdoganî 23ê gulane de xora vat ke ê do hêrişê waranê Îdareyê Xoserî bikerê. Ma pebeyê hêrişêkê neweyî yê. Nika war de têgêrayîşêko zelal ê dewleta tirke çin o, stratejîya hêzanê mîyanneteweyîyan de zî yew vurnayîş çin o la dewlete planêkê tehlukeyînî ser o xebitîyena. Dewleta tirke cara beşêko pîl ê Sûrîye îşxal kerdo. Îdlîb, Efrîn, Cerablûs, Bab, Ezaz, Serêkaniyê û Girê Spî de tewr tay 50 hezar leşkerê tirkî, 10 hezar cergî û bi hezaran tankê înan est ê.

Dewleta tirke nika herême de cerganê DAÎŞî de têkilîye virazena. Wazena vera hêzanê ma cergan bişuxilna. Îxtîmal o ke Tirkîya Rûsya, Amerîka û Hêzanê Koalîsyonê Mîyanneteweyî ra pare kerd ke ê do hêrişêkê neweyî bidê destpêkerdene. Ê zî ma rê vanê ke înan destûr nêdayo Tirkîya. Înan vera gefanê Tirkîya tewirê xo mojna la tewirê înan zaf xurt nêbi.

Ma vera îşxalê neweyî yê Tirkîya amade yê. No îşxal têna ma rê nê pêro herêman rê, pozîsyonê hêzanê mîyanneteweyîyan rê zerar bido. Dewleta tirke ya îşxalkere do derbêka pîle biwera. Sloganê ma no yo, ma do bi haştîye cewab bidê haştîye, bi şerî cewab bidê şerî. Eke vera waranê ma hêriş û şerêko pîl bibo ma zî do şerêkê pîlî bikerê.''