Hozate: Îtîfaqê kurd-ereban seba herême zaf girîng o

Hemsereka Konseya Rayberdişî ya KCKyî Hozate: Îtîfaqê kurd-ereban seba demokratîkbîyayîşê herême eşkera yo. Demokratîkbîyayîşê Rojhelatê Mîyanênî bi xurtbîyayîş û mendebîyayîşê îtîfaqê kurd-ereban beno.

Hemsereka Konseya Rayberdişî ya KCKyî Besê Hozat destpêk de beşê diyînî yê roportajê xo de serrgêra diyîne ya îşxalê Efrînî vist vîrî û vat  hêrişê dewleta tirke yê 20ê çeleyê 2018î yê vera Efrînî planêko mîyanneteweyî bi, dewamê komployê mîyandewletî yê 9ê teşrîna verêne û 15ê sibate bi.

Hozate vat: ''Tarîx, xoza û mîrasê kulturî yê Efrînî yenê çinkerdene. Nê pêro zî verê çimanê dinya de benê. Demografîyê Efrînî yeno çinkerdene.  Ganî şarê ma û hêzê ma yê rayberî têkoşînê xo xurt bikerê. Têkoşînê Efrînî ganî bibo pîl û dewam bikero.

Hêrişê vera Serêkanîyê û Girê Sipî seba tasfîyekerdişê sîstemê Îdareyê Xoserî yê Rojawanî bîyî. Bi paştdayîşê DYA û Rûsya dewleta tirke hêrişanê 9ê teşrîna verêne hema zî dewam kena. Eşkera yo ke plananê neweyan ser o xebitîyenê. Wazenê ke şerê ereb-kurdî biqewimo. Îtîfaqê ereb-kurdî nê planî pûç kerdî.Xoverdayîşê Rûmetî yê vera îşxalê dewleta tirke hem Kurdîstan de û hem zî dinya de şaran rê zaf tesîr kerd. Ereban, asûr-suryanan û komelanê bînan QSD reyde şer kerd, xo ver da. No xoverdayîş zî bêmabên dewam keno.

Dewleta tirke wazena ke êzidîyan qir bikera. Eke HPG, YPG-YPJ û YBŞ nêbiyêne dewleta tirke rewî ra êzidîyî qir kerdbi. Dewleta tirke nêeşkîya bi DAÎŞî nê planê xo bikera coka bi teyarayanê şerî hêrişê Şengalî kerd.Dewleta tirke sînoranê teberî de sîyasetê şerî kena, herêmê ke îşxal kerdî bestena erdê xo. Êyê ke dewleta tirke kena sucê merdimîye yê. Têkoşînê vera naye meşrû yo.

Îtîfaqê kurd-erebî seba demokratîkbîyayîşê herême eşkera yo, girîng o. Îtîfaqê kurd-erebî yê Rojawanî averşîyayîşêko bêhempa viraşt. Vera DAÎŞî û dewleta tirke ciwananê kurd û ereban pîya têkoşînêko pîl da, netîceyê girîngî vistî destî. Caardişê nê îtîfaqî pêro herêne de seba demokratîkbîyayîşê Rojhelatê Mîyanênî, azadî û haştîya herême zaf girîng o. Demokratîkbîyayîşê Rojhelatê Mîyanênî bi xurtkerdiş û mendekerdişê îtîfaqê kurd-ereban beno. Karê seba nê armancî wezîfeyêko zaf ercaye û fîraz ê."