HPG: Çelê de 4 leşkerî ameyî kiştene

Gerîlayanê HPG/YJA STARî hemverê leşkeranê ke seba asayîşê rayîrî gure kerdêne çalakîyêk viraşte. Çalakîye de 4 leşkerî ameyî kiştene.

Merkezê Çapemenî û Îrtîbatî yê HPGyî detayê çalakîya ke gerîlayan Çelê de viraştebî eşkera kerdî.

HPGyî da zanayene ke roja 13ê Teşrîna peyêne saet 14.30 de gerîlayan hemverê artêşa tirkî ya îşxalkare ke mabênê qilê Koordîne û qilê Patrîotî yê pabesteyê Çelê de rayîrê asayîşî viraştêne çalakîyêk viraşte.

HPGyî vat: “Wesîyatêkê kepçeyî û wesayîtêkê eskerîyî yê ke xebata rayîrî kerdêne bi hawayêkê bitesîrî ameyî hedefgirewtene, netîce de wesayîto eskerî û kepçe ameyî îmhakerdene. Qaso ke tesbît bi na çalakîye de 4 leşkerê dişmenî ameyî kiştene.”

HPGyî bale ante ke artêşa tirkî ya îşxalkare serê ‘medyaya hewûze’ ra na çalakîye bi xeberanê zûran seke çalakîyêk ke hemverê sivîlan amîya kerdene ramota û vat: ''Herêma ke qalê ci beno herêmêka eskerîye ya, rayîrê ke yenê viraştene zî seba sivîlan nê seba leşkeran û îşxalî yenê viraştene. Loma çi kesê ke nê rayîran de xebetênê leşker û hemkarê artêşa tirkî ya îşxalkare yê. Ganî şarê ma îtîbarê xeberanê zûran ê şerê taybetî mekero.”

HEFTANÎN Û AVAŞÎNÎ SER O HÊRIŞO HEWAYÎ

HPGyî derheqê hêrişanê hewayîyan ê artêşa tirkî de zî nê hayîdarîyî dayî: “Roja 12ê Teşrîna peyêne mabênê saetanê 09.30 û 11.00 de teyareyanê şerî yê artêşa tirkî ya îşxalkare wareyê Keşan û Şehîd Kendalî yê pabesteyê herêma Heftanînî yê Wareyê Pawitişê Medya yê bombardûman kerdî. Teyareyanê şerî roja 13ê Teşrîna verêne saet 11.30 de wareyê Dola Şîvê yê pabesteyê herêma Avaşînî û saet 13.30 de dormeyê awa Avaşînî û saet 16.20 de zî wareyê Stûna bambardûman kerdî.”