Hrant Dînk cayê qetilkerdişê ci de ame yadkerdene

Mudirê Pêroyî yê rojnameyê Agosî Hrant Dînk serrgêra 14 . ya şehadetê ci de cayo ke tede ame qetilkerdene de ame vîrardene.

Mudirê Pêroyî yê rojnameyê Agosî Hrant Dînko ke 19ê çeleyê 2007î de Îstanbul de ame qetilkerdene cayê şehadetê ci de ame yadkerdene.

Rîyê Korona ra merasîmê yadkerdişî teng ame tepiştene. Keye û embazê Dînkî tewrê yadkerdişî bîyî. Verê yadkerdişî polîsan dormeya rojnameyê Agosî girewt û têna destûrê rojnamegeran da. Banê Agosî yo verên de pankartê ''14ê serrê bê Hrantî'', ''Ti tîya yê Ahparîg (bira)'', ''Heta ke ma mevajê qedîya, na dewa  do nêqedîyo'' ameyî daliqnayene. Cayo ke Hrant Dînk ame qetilkerdene  de mum û vilîkî ameyî ronayene. Sey her serre emser zî deyîra Sari Gelîne vengê Hrant Dînkî ra ameyî goşdarîkerdene. Saete 15:05 keyeyê Dînkî ame nuqtaya yadkerdişî û merasîm dest pêkerd. Eşkerayîye emser hetê cinîya Dînkî Rakele Dînkî ra ameye wendene.

Rakele Dînk vat: ''Hende qirkerdiş û qetilkerdişî bîyî ke hende dejî pîyî pêser ke ma hînî şarmîyenê ke qala dejê xo bikerê. Çi heyf ke yew dewleta ma esta ke meseleyê ci bi hemwelatîyan nêqedîyenê. Heta ewro kamî pê mergî dişmenîye û şerî qezenc kerdo? Nê têna dej, merg û feqîrîye zafêr kenê. Herinda rindîye û heskerdişî de qey şer û mergî vîjnenê? No hûmayî rê zî dişmenîye ya.

Dewaya mêrdeyê me 14 serrî dewam kena. Nêwazenê dewa çareserî bikerê, wazenê ke biqefilnê. Heta ewro înan ke tedît kerd û hedef ramojna hema îfadeyê înan nêameyo girewtene. Ge vanê Feto, ge vanê Ergenekon kişto. Xora ê zî dest û lingê ti yê. Şima yewbînan ra cîya nîyê. Dewlete seba ke îspat bikero ke qetilkare nîya, xîret kena ke kavê xo îspat bikero. Nê welat de heme xirabîye estê, mela ma sîya giredê.''