Hukmatê tirkî mexdûranê erdlerzî ceza keno

Hukmatê tirkî herinda ke hetkarîya mexdûranê erdlerzî bikero hîna zêdêr înan mexdûr keno. Bi giranî zî dewijanê ke raya xo danê HDPyî ceza keno.

Erdlerzê Xoyî yê Rojhelatê Kurdîstanî tesîrê 4 dewanê qezaya Elbakî yê Wanî kerd. Erdlerz de Elbak de 9 kesî merdî, 37 kesî zî birîndar bîyî û rewşa 9ê înan giran a. Qeza de bi seyan bînayî xera bîyî. Hukmatê tirkî ke erdlerzî ra dima bi peygoşîye nêzdîyê karanê xelisnayîşî û hetkarîye bi, verê HDPyî û rêxistinanê komelkîyan ê sivîlan de asteng o ke karê hetkarîye û xelisnayîşî bikerê.

Erdlerzî ra 4 rojî vîyartî la hema zî hukmatê tirkî gamêkê hewce û qîm kenê nêeştê. Herêma erdlerzî de hema zî hewceyê mexdûranê erdlerzî bi xeyman, betanîyayan, werd û cayê mendişî esto. Têna seba merdiman ney seba heywanan zî awe çin a. Wekîlê HDPyî Murat Sarisaçî bale ante tewirê hukmatî ser û vat hukmat kurdan ceza keno.

Wekîlê HDPyî yê Wanî Murat Sarisaçî derheqê astengkerdişê kamyonanê înan ê hetkarîye de zanayîşî dayî û qala ci kerd ke çira ê koordînasyonê AFADî tesdîq nêkenê. Sarisaçî pare kerd ke wekîlanê HDPyî, temsîlkaranê DBPyî, HDKyî, KCDyî hemşaredaranê Sêrtî, Elîhî, Patnosî Gîyadînî reyde waşt ke cewab bidê hewcedarîyanê serekan la belê verê înan ame girewtene û vat: ''Ma ra waşt ke ganî ma hetkarîya xo bidê AFAD ke o vila bikero. Ma no qebul nêkerd. Çunke ma dî ke hetkarîyê ma senî depoyan de yenê vindertene û bi hawayêkê bêdûştî yenê vilakerdene. Sîcîlê AKPyî nê warî de baş nîyo.

Ma şîyî dewanê xo, temamîya înan weçinîtoxê HDPyî yê. Atmosferêko winasên viraşt ke seke ma hetkarîya înan asteng kenê. Armancê înan îzolekerdişê HDPyî û cezakerdişê kurdan o.  Şarî rê nê zimistanî de xeymê hamnanî dayî. Wan sey herêma afetî nêame îlankerdene. TOKÎ tîya de do bînayan bivirazo û hemwelatîyan ser o pere qezenç bikero. Têna derdê înan no yo.Bi wesayîtanê zirxînan, konvoyan yenê, fotograf gênê, dîmenî gênê û şinê. No zî metodêkê cezakerdişê kurdan o. Na herême de raya ma zêde ya.''

Muxtarê dewa Elbîsî Cezmî Aslanî pare kerd ke erdlerzê qijî hema zî dewam kenê û dewijî mîyanê zor û zehmetîyan de ciwîyenê. Aslanî ard ziwan ke se ra 50 keyeyê dewijan bi temamî rijîyayî. Aslanî vat: ''Ma venga xêrkeran danê ke herkarîya dewijanê ma bikerê.''