‘Ma veng bidê vengê Xoverdayoxanê Zîndanan‘

Maye û pîyê Salîh Şîmşek o ke zîndan de girevê vêşanîye de yo, vanê ganî semedê paştayîşê heme Xoverdayoxanê Zîndanan cade çîyêk bêro kerdene û vengê înan bidîyo eşnawitene.

Keyeyê Salîh Şîmşek o ke 31 rojîyo Zîndano Girewte yê Elbîstanî yê Mereşî de yo, veng da ke her kes semedê Xoverdayoxanê Zînadanan tê bigêro û vengê înan rê  bibo veng.

Wa şarê Kurdî seba paştdayîşê xoverdayoxan hurzo lingan ser

Pîyê  Salîh Şîmşekî, Behçet Şîmşekî ard ziwan ke lajê ey 18 serre ame tewqîfkerdene û 22 serrî yo zîndan de yo û va, verê 12 serrî ceza ameye dayene, dimayê temyîzî ceza bîye 36 serrî. Lajê mi 31 rojî yo grevê vêşanîye de yo û vano ke eke waştişê înan merê ca ê do heta merdişî dewam bikerê. Şew  û roja ma bewlî nêyê. Goşê ma telefon de yo. Ma vanê beno ke xebara xirabe bêro. Ma sey keye û şar zaf tengayî ancenê. Hetê bînî ra bêvêngîye esta û na zî hîna ganê ma dejnena. Çiyo wînayên nêno qebûlkerdene. Wa şarê Kurdî hurzo lingan ser û veng bido na çalakî û sîtemî ra vajo hînî bes o.‘‘

Ganî ma vernîya heme zîndanan de  dest bi grevê vêşanîye bikerê

Maya Salîh Şîmşekî Seher Şîmşeke zî qesawetê xo wina ard ziwan: ‘‘Salîh qijê mi yo verên o.  Mîyanê embazanê xo de zaf ameyêne heskerdene. Nika zîndan de zî wina yo. Salîh her ca de xo dano heskerdene.  Gama ke mi o raya peyêne dî rewşa ci hole bî û moralê ci ca de bi, la nika senîno nêzana. Ez paştî dana lajê xo la ez dayîk a , no dej mi rê zaf giran o. Ma dayîkî zî nêzdîra dest bi grevî kenê. Xora nika zî senî ke ma grev de bî. Ma nê wer wenê, ne zî rakewenê.  No zilm û zext ganî bêro qedîyayene. Wina nêben. Gonî bi gonî nêna pakkerdene, bi awe yena pakkerdene. Ez veng dana heme keyeyanê Xoverdayoxanê Zîndanan, ma ganî heme vernîya  zîndanê ke qijê ma tede yê de dest  grevî bikê. Qijê ma tena, bê wayîr nêyî. Peynîya înan de keyeyê înan û şarêk esto.‘‘