Meclîsê Ciwanan ê Dêrsimî yê HDP’yî ame îlankerdene

Meclîsê Ciwanan ê Dêrsimî yê HDP’yî yo ke awanbîyayîşê xo îlan kerd, soz da ke ê do hemverê her tewir polîtîkayanê qirkerdişê kulturkîyî, zihnîyetê pederşahîye, talankerdişê ekolojîkî û kiştişan de vinderê.

Meclîsê Ciwanan ê Dêrsimî yê Partîya Şaran a Demokratîke (HDP), awanbîyayîşê xo îlan kerd. Pîya bi parlamentera Amedî Semra Guzele û xeylî ciwanî tewrê eşkerayîya ke banê bajarê Dêrsimî yê HDP’yî de amî dayene bîyî. Îlankerdişê meclîsî dimayê rêzgirewtişî ra ame kerdene.

Dîlara Arase qiseykerdişê xo de ard ziwan ke înan sey Meclîsê Ciwanan ê HDP’yî seba vernîgirewtişê rijnayîşê Hesenkeyfî çalakîyêk viraşta. Arase vat ke ciwanî halkerdişê problemanê cimatkîyan de wayîrê rolêkê serkêşî yê, labelê ciwanî ewro cimatî ra ameyê visnayene û vat, “Ciwanî rastê rayberdişêkê leymin û teberê merdimîye yenê. Bi ajankerdiş, tîryakî, ercan ra dûrîvistiş û cuya puyayîye kenê ke ciwanan mesuldarîya cimatkîye ra dûrî bifînê.” Arase vat ke ê sey ciwanan soz danê ke ê do hemverê her tewir polîtîkayanê qirkerdişê kulturkîyî, zihnîyetê pederşahîye, talankerdişê ekolojîkî û kiştişan de vinderê.

‘Mucadeleyê Ma do Nêqedîyo’

Semra Guzel a HDP’yije ya ke dima ra qisey kerd, îlankerdişê Meclîsê Ciwanan pîroz kerd, vat ciwanî serkêşê cimatî yê û nê vatî: “Her çende polîtîkayê asîmîlasyon û qirkerdişî dewam bikerê zî ciwanîyêk ke xover dana esta. Partîyêk ke ruhê aye yê mucadeleyî ciwan o esta. Mucadeleyê ma yo ke cigêrayîşê heqîqetî de yo çi rey do nêqedîyo.”

Dima ra sînevîzyonêk ke qalê Qirkerdişê Dêrsimî yê 1937-1938’î kerdêne ame ramotene.