Medyaya Almanî cehd kena ke çalakîya Şakarî manîpule bikera

Seba ke çalakîya Ûgûr Şakarî yo ke bajarê Krefeldî yê Almanya de bedenê xo da verê adirî bêra manîpulekerdene, medyaya Almanî de xeberê dezenformasyonî yenê kerdene.

Kurdistanijo bi nameyê Ûgûr Şakarî 20'ê Sibate de verê mahkemeya bajarê Krefeldî ya Almanya de, seba şermezarkerdişê tecrîdkerdişê Rayberê Şarê Kurdî Abdullah Ocalanî bedenê xo dabi verê adirî.

Şakar o ame berdene bi nêweşxaneyê bajarê Dûîsbûrgî, da zanayene ke se ra 67 bedenê ey veşaya. Hema çalakîya Şakarî ra dima, tayê organanê medyayanê eyaletê NRW’yî de, xeberê seba manîpulekerdişê çalakîye ameyî weşanayene

Şakar çalakwananê rayraşîyayoxan ê rayraşîyayîşê dergî ra yew bi ke çend hewteyî verê cû bajarê Mannheîmî de kewtibi rayîr û zaf reyan bibi hedefê polîsanê Almanî. Balkêş o ke derheqê Şakarî de xeberî seke yew merkezî ra ameyê nuştene, yenê weşanayene.

Şakarî mektuba xo ya verê çalakîye de wina nuştibi, “Ez tecrîdê serê Rarber Apoyî protesto kena. Reyna hêrişê dewleta Almanî ya vera Kurdan rê zî lanet kena.” Xeberanê çapemenîya Almanî de qet qalê mektuba Şakarî nêno kerdene û o sey 'sûcdarêkî krîmînel' yeno mojnayene.

XEBERÊ ŞAŞÎ MERKEZÊK RA YENÊ VILAKERDENE

Bi taybetî rojnameyê "Rheînîsche Post" roja verî ra nat bi waşanayîşê xeberanê şaşan cehd kenê ke çalakîya Şakarî eksê ci de bimojno. Rojnameyî xebera xo ya vizêrî de îdîa kerd ke Şakar o ke 43 serrî yo beno ke "nêweşê aqilî" bo. Eynî îdîa zaf rojnameyanê cîyayan ê eyaletê NRW'î de ameyî weşanayene.

Xeberan de reyna ame vatene  ke vizêrî keyeyê Şakarî hetê polîsan ra ameyo sehnayene. Rajnameyan da ame nuştene ke Şakar menga Çele de seba ke tewrê çalakîyêka bêdestûre ya Dusseldorfî bîyo derheqê ey de tehqîqat ameyo kerdene û seba Şakarî vat, “Kesêko hetê polîsan ra yeno naskerdene”.