Serekê Şubeyê Wanî yê Komeleya Heqanê Merdiman (ÎHD) Murat Meletî nêrazîbîyayîşê xo  vera tecrîdê Ocalanî mojna.

Murat Meletî ard ziwan ke tecrîd sucêko tewr giran o ke vera merdimîye yeno kerdene û cayê ci huqûq de, qanûnê bingeyî de, krîterê komelkî de û qanûn de çin o.

Meletî ard ziwan ke no kerdişê vera merdimîye wextêkê dergî ra nata Tirkîya de yeno caardene û tecrîdê vera Ocalanî roje bi roje yeno girankerdene.

Meletî vat: "Tecrîdê Birêz Ocalanî nê têna tecrîdê Birêz Ocalanî yo.  Sucêko giran ê vera her keso ke Ocalanî ra hes keno û hewceyê vînayîşê ey o yo.Tecrîd sîstemêkê îşkenceyî yo, îşkence bi xo yo.

Seba haştîye hewce esto ke Ocalan reyde pêvînayîşî bêrê kerdene. Ma reyna tîya ra veng danê ke tecrîd vera merdimîye yo. Seba ke Tirkîya de haştîyêka mende û rûmetêne bêra kerdene ganî tecrîdê Ocalanî bêro wedaritene."