MPŞ: Ruhê xoverdayîşê 14ê Temmuze do bibo ruhê serkewtişî

Fermandarîya Qerargehê MPŞyî xoverdayoxê rojeyê mergî yê 14ê Temmuze bi rêzdarî yad kerdî û pare kerd ke ê do pê ruhê xoverdayîşê 14ê Temmuze têkoşînê dewirê neweyî berz bikerê.

Fermandarîya Qerargehê Merkezê Pawitişê Şarî (MPŞ) pê wesîleya serrgêra 38. ya Xoverdayîşê Rojeyê Mergî yê 14ê Temmuze eşkerayîyêke weşanaye.

Eşkerayîya MPŞyî wina ya:

''Serrgêra xi ya 38. de ma xoverdayîşê 14ê Temmuze û ruhê serkewtişî rê selam kenê. Şexsê Mehmet Hayrî Durmuş, Kemal Pîr, Akîf Yilmaz û Alî Çîçekî de ma pêro şehîdanê têkoşînê azadîye bi rêzdarî û minetî yad kenê. Ma soz danê ke ma do xeta xoverdayîşî yê 14ê Temmuze de rêçê şehîdanê xo yê çêran de serkewtişî reyde şorê. Ma sey şar û têgêrayîşî 38 serrî yo ke esasê bira xoverdayîşî ser o şinê û têkoşîn kenê. Şarê Kurdîstanî têkoşînê xo yê azadîye nê esasî ser o pîl kerd û destkewteyê tarîxîyî vistî destî. Sey vizêr ewro zî xoverdayîş û ruhê 14ê temmuze rayîrê ma roşnî keno û nê esasî ser o têkoşînê vera faşîzmî yeno caardene.

Serrgêra 38. ya Xoverdayîşê Rojeyê Mergî yê Pîlî yê 14ê Temmuze de Têkoşînê Azadîye yê Kurdîstanî derbazê safhayêka tewr girînge û tarîxîye beno. Hêzê faşîstî vera têgêrayîşî pê pêro îmkananê xo hêriş kenê la hêrişê înan bênetîce manenê. Têkoşînê ma her roje cewab dano hêrişanê dişmenan.

Hêzê hegamonî bi taybetî Başûrê Kurdîstanî de hêrişê şar û têgêrayîşê ma kenê. Dewleta tirke ya îşxalkere na çarçewe de Herêmanê Pawitişî yê Medya de û Başûrê Kurdîstanî de dest pê hêrişan kerd ke şarê ma qir bikera. Gerîlayê Kurdîstanî pê ruhê 14ê Temmuze vera îşxalkeran têkoşîn kenê. Xeta xoverdayîşî ya ke nika Heftanîn de xo mojnena ruhê Hayrî, Kemal, Akîf û Alîyî yê.  No xoverdayîşo pîl pê keda şehîdanê ma ame awankerdene. Embaz Kasimo ke sey teqîbkerdoxê ruhê 14ê Temmuze xo şarê xo rê feda kerd, sey fermandarê rayberî û embazêkî tim do têkoşînê ma roşnî bikero. 

Nê esasî ser o şexsê xoverdayoxanê 14ê temmuze de ma temsîlkaranê xeta xoverdayîşî  bi rêzdarî û minetî yad kenê. Pê ruhê xoverdayîşê 14ê Temmuze ma do têkoşînê dewirê neweyî berz bikerê, alaya serkewtişî yê şehîdan darde bikerê. Ma pê na qerardarîye şarê xo rê selam kenê. Ma venga ciwananê Kurdîstanî danê ke zêdêr mesuldarîye bigêrê xo serî û bi hawayêkê aktîfî tewrê têkoşînî bibê.''