Nasnameyê 2 şehîdan ê cinîyan ameyî eşkerakerdene

HPGyî da zanayene ke 2 gerîlayê YJA-Starî şehîd bîyê û vat: ''Ma soz danê ke xeta şehîdan de bêtawîz şorê û armancanê şehîdan ser bivisnê.''

Merkezê Îrtîbatî û Çapemenîye yê HPGyî bi eşkerayîyêke da zanayene ke 2 gerîlayê YJA-Starî şehîd bîyê. Eşkerayîye wina ya:

''Artêşa tirke ya îşxalkere 18ê hezîrane de saete 20.30 de vera herêma Herekolî operasyonêk da destpêkerdene. 18-19ê hezîrane de herême bi giranî dîyaye bombayan ver. Dima 20-21ê hezîrane de zî herême pê helîkopteranê hêrişî dîyaye bombayan ver. Operasyono ke heta 21ê hezîrane dewam kerd, tede mabênê hêzanê ma û îşxalkeran de pêkewtişê giranî qewimîyayê. Nê pêkewtişan de embazê ma Jîyane û Arîne bi fedayîtî şer kerd, sey milîtananê rûmetênan ê YJA-Starî xo ver da û şehîd bîyî

Ma sere de keyeyanê ercîyayeyan ê embazanê xo rê, şarê Botan û şarê welatperwerî yê Kurdîstanî rê serweşîye wazenê. Ma soz danê ke xeta şehîdan de bêtawîz şorê û armancanê şehîdan ser bivisnê.

Nasnameyê embazanê ma yê şehîdan wina yê:

Nameyê Qodî: Jîyane Amargî

Name û Peyname: Esma Avşar

Cayê Bîyayîşî: Şirnex

Maye-Pî: Hedîye – Bakî

Tarîx û Cayê Şehadetî: 20ê Hezîrana 2022yî / Herekol

Nameyê Qodî: Arîne Hezex

Name û Peyname: Şukrane Alp

Cayê Bîyayîşî: Mêrdîn

Maye-Pî: Selime – Mehmet Sait

Tarîx û Cayê Şehadetî: 20ê Hezîrana 2022yî / Herekol

 

Embaze Jîyane Cizîra Botanî de dadîya xo ra bena la Êlih de bena pîl. Wexto ke dadîye ra bena keyeyê ci nameyê 'Jîyane' nano pa la dewlete nê nameyê kurdkî qebul nêkena coka nasname de nameyê ci Esma bena. Xale, ap, deza û kênaya amika Jîyane serranê 90an de mîyanê têkoşînî de şehîd benê.  

Embaz Jîyane Zanîngehê Sêwasî de wanena û yena destbendkerdene. Şehadetê embazêka xo ra dima zî mîyanê xebatanê têkoşînî de ca gêna.

Embaze Jîyane dima serrgêra Qirkerdişê Helebçe 16ê adare de tewra gerîlayan bena. Embaze Jîyane cade bi coşî adapteya cuya gerîlayan bena û perwerdeyê verênî ra dima Garê de gerîlatîye pratîze kena.

Embaze Jîyane 2015 de dewreyê çapemenîye yê Şehîde Denîze Firat de perwerde vînena. Embaze Jîyane bi nê hawayî Zap û Avaşîn de sey muxabîra şerî û xebatkara çapemenîye karan kena. Embaze Jîyane dima 2017 de Heftanîn de karan kena û hişmendîya xeta partîye hîna zaf mojnena.

Embaze Jîyane dima Akademîya Şehîde Bêrîtane de perwerde vînena û verê xo dana koyanê Botanî. A rêçê Halîl Dag, Cesûr Roboskî, Arjîne Amed, Alî Kanîroj, Ferzad Medî de derbazê Vakurî bena. A mîyanê şertanê zehmetan de Besta ra heta Gabarî, Katoyî ra heta Herekolî xeylêk waran de xebatanê gerîlatîye û çapemenîye kena.

Embaze Arîne qezaya Hezexî ya Botanî de dadîya xo ra bena. Embaze Arîna ke amika ci  şehîda têkoşînî ya, goş dana vengdayîşê Rayberîye yê serê seferberîya Kobanê û tewra têkoşînî bena.

Wextê Xoverdayîşê Kobanê de çalakîya Arîne Mîrkan zaf tesîrê embaze Arîne kena coka a xo rê nameyê Arîne weçînena.

Embaze Arîne dima derbazê Herêmanê Pawitişî yê Medya bena, perwerdeyê verênî vînena û dest pê pratîkî kena. A îdeolojîya azadîya cinîyan a Rayberîye de zî xo aver bena. A wextêk akademîya Hakî Karerî de zî perwerde vînena û kena ke biba 'Xwebûn' (xobîyayîş.)

Embaze Arîne dima ke xo pêro şertan rê amade kena verê xo dana Botanî û sey fermandarêka YJA-Starî agêrena koyanê xo. A zaf binê tesîrê şehadetanê Delale Amed û Azê Malazgîrt de manena û armanc kena ke qesasê înan bigêra. A bombardumananê 18-21ê hezîrane de Herekol de embaze Jîyane Amargî reyde şehîd bena.''