Omer Ocalan: Tecrîdê Îmraliyî vera qanunê bingeyênî yo

Parlementerê HDPyî Omer Ocalanî dîyar kerd ke tecrîdê Îmraliyî yeno a mana ke dewlete qanunê xo yê bingeyênî rê zî hurmet nêkena.

Rayberê Şarê Kurdî Abdulah Ocalan heşt serran ra dima reya verî 2ê gulane de, tewr peynî zî 7ê tebaxe de awukatanê xo reyde pêvînaybî. Parlementerê HDPyî Omer Ocalanî tecrîd ANFyî rê nirxna û dîyar kerd ke na yewe yena mana ke Tirkîya de huquq nêmendo.

Omer Ocalanî vat ke : “Demo ke mesala Rêzdar Ocalan bo qanunî yenê vurenayene û nênê caardene. Dewlete ge bi tecrîdî ge zî bi bahaneyanê pûçan nê heqê bingeyênî asteng kena.” Ocalanî bale anite ser ke ê dewlete ra lutifî nêpawenê û ganî qanuno bingeyên ê darbeyê 1982î bêro caardene.

‘Bi tecrîdî wazenê ke têkilîya Ocalanî bi şarî ya qut bikerê’

Ocalanî dîyar kerd ke seba kesan huqûqêko taybet nêno tetbîqkerdene û vat ke : “Rêzdar Ocalan keseko elelede nîyo. O temsilkarêk o. Bi nê tecrîdî wazenê ke têkilîyê nê temsîlîyetî bêrê qutkerdene. Yeno zanayene ke o verê şarê kurdan û verê sîyasetî keno yo. Rêzdar Ocalan Rojhelatê Mîyanênî de û çar parçayanê Kurdîstanî de wayîrê êrjêk o.”

‘Dewlete êrjî nîşanê qanunê xo yê bingeyênî zî nêdana’

Ocalanî dîyar kerd ke bi grevê vêşanîye tecrîd amebi şiknayene û vat: “Tecrîdê Îmraliyî yeno a mana ke dewlete tengizîya. Dewlete hurmet nîşanê qanunê xo yê bingeyênî zî nêdana. Çend aşmî verî Wezîrê Edeletî Abdulhamît Gulî vatibi ke ‘tewr astengîye verê pêvînitişê Ocalînî de çin a.’ La nika yeno dîyene ke înan qanunê xo zî girewtê binê payan.”

Parlementerê HDPyî Omer Ocalanî dîyar kerd ke galê vera Rojawanî 9ê teşrîna verêne de serrgêra komploya mîyanneteweyî de ameyê kerdene û no çîyêko tesadufî nîyo û ganî wina bêro nirxnayene.

‘Îradeyê 6 mîlyon kesan mîyanê adirî ra ameyo vetene’

Ocalanî behsê destsernayîşê 20 şaredarîyanê HDPyî zî kerd û vat: “Bi qeyuman sîyasetê kurdan nêeşkeno bêro tesfîyekerdene. Na êdî meseleya îrade û bawerî ya. HDPyî 6 mîlyon rayî girewtî. Nê 6 mîlyon rayî îradeyêko winasî yo ke mîyanê adirî ra îrade ameyo vetene. Ma hêzê xo şarê xo ra gênê. Ganî ma nê têkoşînî her kolanî de awan bikê.”