Payîz dîya amadekarîya zimistanî dest pêkerde

Cinîyê ke baxçeyê xo de bi kedêka pîle sebzeyî ramitî, nika sebzeyanê xo arê danê û seba werdê organîk û weşî amadekarîya zimistanî zî kenê. Cinîyî bi nê hawayî paştî danê ekonomîya keyeyî zî.

Payîz dîya amadekarîya zimistanî dest pêkerde. Qezaya Tûşba ya Wanî de cinîyê ke baxçeyê xo de bi kedêka pîle sebzeyî ramitî, nika sebzeyanê xo arê danê û seba werdê organîk û weşî amadekarîya zimistanî zî kenê. Cinîyî tirşî, rîçal, konserveyan virazenê û seba zimistanî sebze û meyweyanê xo kenê wişk.

Soylemeze Pazar û Medîne Pazar derheqê amadekarîyanê xo de qisey kerd.

Soylemeze vat: ''Darê ma yê xewxan zêde yê. Ma xewxan wişk kenê. La karê ci esto. Ma sebze û fêkîyê wişkan roşenê. Sewbîna ma zî sebzeyan ra konserveyan virazenê. Heta hamnanî qîm keno. Ez serê sibayî rew şîna baxçe. Sebzeyê ma organînik ê. Ez hormon û zibil nêxebitnena.''

Soylemeze îfade ke a beşêkê pîlî  yê qezencê xo dana fatureya awe û bale ante ser ke awe û ceyran vay ê. Soylemeze vat: ''Ez 5 mengan baxçe awe dana. Her menge 500 TL fature dana. Awe keyeyî zî cîya dana. Beşêkê pîlî yê qezencê xo dana awe û ceyran. Awe û ceyran zî vera benê vayêr.'' 

Medîne Pazar vat: ''Ma bi sebze û meyweyanê  baxçeyê xo debarê xo kenê. Ma wisaran bezre  erzenê. 3 mengan ewnîyenê ci. Dima ra arê danê. Ma sebze û meyweyanê xo roşenê. Ma awa firingan û konserve virazenê. Karêko zehmet o la ez ci ra hes kena. Lane, gilgil, firingî û sebzeyê bînan roşena. Wextê tirşî zî lane roşena.  Muşterîyê ma yenê baxçe çi biwazê gênê û şinê.”