Paylan: Ma sey Amedî sereberz payra yê

Amedijan çalakîya roniştişî ya vera îşxalê qeyûmî ra dima eşkerayîya çapemenîye viraşte û mesajê ‘ma sereberz payra yê’ da.

Partîya Şaran a Demokratîke (HDP) ya ke qerarê çalakîyanê bêmabênî girewto, ewro çalakîya roniştişî ya roja şeşîne ra dima eşkerayîyêk daye û bale ante muhîmîya xoverdayîşî ser.

Eşkerayîye de parlamenterê HDP’yî yê Amedî Garo Paylanî qisey kerd. Paylanî  nê vatî: ‘’Ma rixmê  heme hêrişan û xirabîye sereberz payra yê. Hemserekê ma pîya bi parlamenter hemşaredar û xebatkarê ma eştî zîndanan la ma peyser geme nêeşte û xover da. Ma newe ra kewtî weçînitiş û Amed, Wan û Mêrdînî îradeyê xo reyna weçîna. Erdogan reyna vizêr îftîra eşt hemserekanê ma. Ma nînan qebûl nêkenê. Xora şaredarîye rîyê qeyûman ra kewtî binê deynanê girdan, senî koyî rê pere şawenê? Eke ewro vera qeyûman Tirkîya û dinya bêveng bimano, Erdogan sucanê xo rê do dewam bikero. Ma sey Amedî vera qeyûmî sereberz payra yê û ma do qeyûmî bişawê.  Ganî her kes vera qeyûmî vengê xo berz bikero.’’