Perî û 3 şaredarîyanê  bînan ê HDPyî de qeyûm ame tayînkerdene

Şaredarîyanê Hezro û Yenîşehîrî yê Amedî, Şaredarîya Hezexî ya Şirnexî û Şaredarîya Pêrî ya Mazgêrdî ya Dêrsimî de bi fermanê Wezaretê Karanê Zereyî qeyûm ame tayînkerdene.

Hemşaredarê Şaredarîyanê Hezro û Yenîşehîrî, Şaredarîya Hezexî ya Şirnexî û Şaredarîya Perî ya Mazgêrdî ya Dêrsimî bi fermanê Wezaretê Karanê Zereyî wezîfe ra ameyî girewtene û herinda înan de qeyûm ame tayînkerdene. Heta nika seba 16ê şaredarîyanê HDPyî qeyûm amebî tayînkerdene. Na hûmara bîye 20.

Şaredarîya Perî ya Dêrsimî de qeyûm ame tayînkerdene. Cendirmeyî nêverdenê hemserekê Şaredarîya Pêrî Songule Dogan û Orhan Çelebî dekewê zereyê bîna û dormeyê bînaya şaredarîye hetê cendirmeyan ra ame girewtene.

 

Polîsî serê sibayî rew şîyî keyeyê Hemsereka Şaredarîya Hezexî Songule Erden ke teblîgatî bidê îmzakerdene. Songule Erden teblîgat îmza nêkerd. Ame vatene ke Erdene bi îdîayanê "endamîya rêxistîne" û "propagandaya rêxistine" wezîfeyê ci ra ameye dûrvistene.

Hemsereka Şaredarîya Yenîşehîrî Belgîne Dîken zî bi îdîaya "endamîya rêxistine" wezîfeyê ci ra ameye dûrvistene û herinda aye de qaymeqamê qezaye Murat Beşîkçî sey qeyûmî ame tayînkerdene.

Hemserekê Şaredarîya Hezroyî Ahmet Çevîk zî bi îdîaya "endamîya rêxistine" wezîfe ra ame girewtene û herinda ey de zî qeymeqamê Hezroyî Alî Oner sey qeyûmî ame tayînkerdene. Dormeyê bînayanê şaredarîyanê ke înan rê qeyûm ame tayînkerdene, hetê polîsan ra ame girewtene. Bînayanê şaredarîyan de cigêrayîş yeno kerdene û polîsî nêverdenê endamê meclîsî debikewê zereyî.