PKK’yî seba hemleya xoverdayîşî veng da

Komîteya Rayberdişî ya PKK’yî veng da her kesê antî faşîstî û demokratî ke hemverê sîstemê tecrîdî û îşkenceyê Îmraliyî de hurzê, çalakîyan virazê û vat, aşitî û demokrasî bi nê hawayî eşkenê bêrê.

Komîteya Rayberdişî ya PKK’yî vat, şaro Kurd serrgêra 20’ine de komploya 15’ê Sibate û sîstemê êyê tecrîdî û îşkenceyî yê Îmraliyî qebûl nêkeno û vat, “Hendî nêwazeno înan dir biciwîyo. Wazeno tecrîd bêro wedartene, faşîzm bêro rijnayene, Kurdistan bibo azad û Rayber Abdullah Ocalan bi hawayêkê azadî biciwîyo û bixebitîyo.”

Komîteya Rayberdişî ya PKK’yî bi wesîleyê serrgêra vîstine ya komploya mîyanneteweyîye eşkerayîyêka nûştekîye daye ke şexsê Ocalanî de hemverê şarê Kurdî û şaranê Rojakewtena mîyanêne de ameye kerdene. Eşkerayîya Komîteya Rayberdişî ya PKK’yî wina ya:

XOVERDAYÎŞÊKO BÊHEMPA

“Komploya 15’ê Sibate û xoverdayîşê azadîye yê hemverê komploye kewena serra vîst û yewine. Rayber Abdullah Ocalan hemverê sîstemê îşkenceyî û tecrîdê Îmraliyî xoverdayîşêkê pîlî keno. Ma verê her çîyî nê xoverdayîşê azadîye yê pîrozî û mîmarê ci Rayber Abdullah Ocalanî bi hurmet silam kenê. Ma xoverdayîşê qehremankî yê şarê xo yê hemverê komploye pîroz kenê û şexsê Halît Oral û Aynûr Artane de ma şehîdanê qehremanan ê xoverdayîşê tarîxîyî yê ‘Şima nêeşkenê roja ma tarî bikerê’ bi rêz û hurmet bi vîr anê. Ma sozê xo yê bicaardişê amacê înan reyna tekrar kenê.

BI HEMLEYA XOVERDAYÎŞÎ YENA CIKEWTENE

Têgêrayîşê azadîye yê Kurdistanî û şar ma bi hemleya xoverdayîşî ya ‘Ma do tecrîdî bişiknê, faşîzmî birijnê û Kurdistanî azad bikerê’ kewenê serra 21’ine ya Komploya 15’ê Sibate. Bi serkêşîya hemsereka KCD’yî û parlamentera HDP’yî Leyla Guvene hemleyêka azadîye ya tarîxkîye ameya destpêkerdene û na hemle her cayê Kurdistan, Rojakewtena mîyanêne û dinya de vila bîya. Faşîzmê AKP û MHP’yî nika ra kewta tengasî. Yeno dîyene ke hemleya xoverdayîşî do bêro dewlemendkerdene û hemleya xoverdayîşî do sîstemê îşkence û tecrîdî yê Îmraliyî bişikno û komploya 15’ê Sibate serra ci ya vîst û yewine de bierzo serê çopî. Nê esasî ser o şexsê Leyla Guvene û Nasir Yagizî de ma heme çalakwananê grevê vêşanîye silam kenê û bawerî bi nê çîyî anê ke hewte û menganê vernîya ma de do serkewtişêko pîl û azadîperwer ê tarîxî bêro destfînayene.

VENGDAYÎŞÊ SEBA ESTERITIŞÊ DEQÊ SÎYAYÎ

Seke yeno zanayene komploya mîyanneteweyîye ya ke şexsê Rayber Abdullah Ocalanî de kerdêne ke estbîyayîşê Kurdan û azadîya înan tasfîye bikero, hetê îdareyê DYA ra ê wextî, 9’ê Teşrîna verêne 1998’an de bi vejîyayîşê Rayber Apoyî Sûrîye ra amîbî destpêkerdene û bi esîrgirewtişê Kenyayî yê 15’ê Sibat a 1999’î ravêrt merheleyêka bîne. Wareyê bicaardişê komploya 15’ê Sibate de îdareyê ê wextî yê Îsraîlî, Îngilistanî, Rûsya, Fransa, Almanya, Misir û Yewnanistanî hetkarî daye îdareyê DYA. Nê bingeyî ser o Rayberê Azadîye yê çaxî esîr ame girewtene ke şexsê şarê Kurdî de seba hemeyê şaran û merdimîye mucadele dano. No hêriş sere de şarê Kurdî, heme şaran û cinîyan rê bîyo heqaretêko pîl. Ma veng danê ê hêzan ke wa peynî bi sîstemê îşkence û tecrîdî yê Îmraliyî biyarê û nê deqê sîyayî û heqaretî biesterê.   

HER ÇÎ VERÊ XO DANO SÎSTEMÊ ÎMRALIYÎ

Ma ewro hîna rind vînenê ke komplo rîyê dewaya Kurdan a se serran ra bica amîya û sey sîstemê îşkence û tecrîdî yê Îmraliyî xo ramota. Ma rind zanê ke dewaya Kurdan zî rîyê nenaskerdişê estbîyayîşê Kurdan, nizdbîyayîş û sîyasetê qirkerdişî ra vejîyaya werte. Faşîzm zî, şero taybet zî, planê hêrişê raşanayîşî zî, qirkerdiş û tepiştişî zî, hêrişê barbarî yê Efrînî ra heta bi Bradostî zî rîyê naye ra virazênê. Nê heme serê esasê îşkence û tecrîdê Îmraliyî de, ewro açarîyayê bi îdareyêkê dîktatorîye ya faşîste. Naye ra zî her çî verê xo dano sîstemê îşkence û tecrîdî yê Îmraliyî.

HÊZANÊ ANTÎ FAŞÎSTAN RÊ VENGDAYÎŞ

Naye ra zî hemverîya sîstemê îşkence û tecrîdî yê Îmraliyî yeno manaya hemverîya qirkerdişê Kurdan. Hemverîya komploya 15’ê Sibate yeno manaya dîktatorîya faşîste. Naye ra kesê ke xo ra vanê ma antîfaşîst ê û demokrat ê, ganî hemverê sîstemê îşkence û tecrîdî yê Îmraliyî bê û ganî seba şertanê azadan ê Rayber Apoyî mucadele bidê. Kurdistan, Tirkîya û Rojakewtena mîyanêne de rayîrê aşitîye naye ra ravêreno. Naye ra zî ma veng danê heme hêzanê antîfaşîst û demokratîkan ê Rojakewtena mîyanêne û dinya ke wa tewrê hemleya ma ya ‘Ma do tecrîdî bişiknê û faşîzmî birijnê’ bibê. 

TIRKÎYA DE BI NAMEYÊ DEMOKRASÎ TU ÇÎYÊK NÊMENDO

Ma xeylî rind zanê ke komploya barbare ya 15’ê Sibate qaso ke dest ra yeno wazena azadîya Kurdan çinê bikero, hende zî wazena demokrasîya Tirkîya biqedêno. Çîyo ke yeno dîyene no yo, Tirkîya de qe demokrasî nêmenda. Komploya 15’ê Sibate û sîstemê îşkence û tecrîdî yê Îmraliyî Tirkîya de yeno manaya zextanê faşîstan, teror, kolonyalîzm, vêşanî û feqîrîye. Naye ra zî ganî tewr zaf ciwanî, şar û cinîyî yê Tirkîya hemverê tecrîdî de vejîyê. Naye ra zî sere de TŞYG ma veng danê heme hêzanê demokratan, cinî û ciwanan ê Tirkîya ke tewrê hemleya ‘Ma do tecrîdî bişiknê û faşîzmî birijnê’ bibê û tewrê mucadeleyê Tirkîyaya demokratîke bibê. 

CUYA HENDÎ BI NÊ SÎSTEMÎ NÊBENA

Şarê ma vîst serrî yo 15’ê Sibate sey ‘Rojêka sîyaye’ dano îlankerdene û roje zî tede bi çalakîyan hemverê komploye de vejêno. Rayber Abdullah Ocalan zî na roje sey ‘Roja Qirkerdişê Kurdan’ pênase keno û vengdayîşê seba azadî û demokrasîye keno. Nê bingeyî ser o ma vînenê ke 15’ê Sibate agêraya rojêka çalakîye û xoverdayîşî yê azadî û demokrasîye. Ancî ma têgêrayîş û şar, her ca de bi grevê vêşanîye, rayraşîyayîş, mîtîng, protesto û çalakîyanê gerîlayan kewenê na hemleya xoverdayîşî mîyan. Şaro Kurd komploya 15’ê Sibate û sîstemê îşkence û tecrîdî yê Îmraliyî qebûl nêkeno. Şaro Kurd wazeno tecrîd bêro şikitene, faşîzm bêro rijnayene, Kurdistan bêro azadkerdene û Rayber Abdullah Ocalan şertanê azadan de biciwîyo.  

ŞARO KURD BIQERAR O

Ganî her kes bivîno ke nê wareyî de qerarê şarê Kurdî û dostanê înan zelal o. Qerarê cinî û ciwananê Kurdan, ya partîya ma û gerîlayanê ma zelal o. Hendî tu kes nêeşkeno nê hêzan bido vindartene. Nê hêzî hendî fedaîyê azadîye yê û heta Rayber Abdullah Ocalan şertanê azadîye de biciwîyo, do hemleya xo ya azadîye bidomno. Her Kurd wareyo ke tede yo, do bikero wareyê xoverdayîşî. Nê esasî ser o do hemverê faşîzmê AKP û MHP’yî û hemverê sîstemê tecrîdî yê Îmraliyî do dorê Rayber Apoyî tewirêkê fedaîyaneyî, cuyêka fedaîyaneye û Kurdistanêkê neweyî bidê awankerdene.    

FAŞÎZMÊ AKP-MHP’YÎ DO BIRIJÎYO

Do şar û dostê ma xover bidê, do sîstemê îşkence û tecrîdî yê Îmraliyî bêro perçekerdene û do faşîzmê AKP û MHP’yî bêro rijnayene. Do tecrîd bişikîyo û komploya 15’ê Sibate û sîstemê îşkenceyî yê Îmraliyî do şiro serê sergoyê tarîxî.

Serra vîst û yewine do bibo serra ke tecrîd ameyo şikitene, faşîzm ameyo rijnayene û serra ke xoverdayîşê ma bi ser kewto.

Ma veng danê heme hemrayanê xo yê partîye, hêzanê gerîla, şar û dostanê xo, heme cinî û ciwanan ke serrgêra vîst û yewine de hemverê komplo û tecrîdê Îmraliyî de xoverdayîşê azadîye her ca de xurt bikerê û bikerê serra ke Rayber Apo ameyo azadkerdene.