Plano ke se ra 99 vejîyayîşi ci çîn o

Verê 9ê Teşrîna Verêne heme metode zextî dewre de bî. Pîya bi tehdîtê dewleta tirke û amadekarîya leşkerî û tatbîqatê NATO, Misir û Îranî zî Sûrîye rê zext kerdêne. Ocalanî cehd kerd ke rayîro ke se ra 1 îxtîmalê vejîyayîşê ci esto ra vejîyo.

Rejîmê Anqara  rojanê ver bi 9ê Teşrîna Verên a 1998î de vera Şamî tehdît, santaj û zextî de sînor nasnêkerdêne û hetêkî ra zî bi mabênîyan mesajê hemkarîye dayêne. Rayberê Şarê Kurdî Abdullah Ocalanî semedê ê cehdkerdişê komplokaran peyra vatêne ''Xîretkerdişê Plano ke  se ra 99 vejîyayîşê ci çîn o.''

Ê rojan de têna Anqara nê, heme paytextê welatanê Rojhelatê Mîyanênî de zaf têgarayîş bibi.Tay welatan eşkera kerdêne ke eke şer vejîyo ê perê Tirkîya de yê tayînan zî perê Sûrîye girewtêne. Kronolojîya ê 9 rojan ê krîtîkan ê ver bi 9ê Teşrîna Verêne winabi:

30ê Êlul a 1998: Serekîya Serekkomarê Tirkî Suleyman Demîrelî de Heyetê Asayîşê Mîlî  (MGK) kom bi. Têna yew madeyê rojdemî yê Kombîyayîşo ke 6 saete dewam kerd bibi; têkoşînê vera Ocalan û PKKyî. Goreyê xeberanê ke ê rojan çapemenî de vejîyayî, kombîyayîş de vîjnayîşê leşkerî yê vera Sûrîye ameyî munaqeşekerdene.

1ê Teşrîna Verên a 1998: Qiseykerdişê akerdişê meclîsî yê Demîrelî ra qerarê MGKyî ameyêne fehmkerdene.Demîrelî ke Şam tehdît kerdênê wina vatêne: ''Ez heme dinya rê îlan kena ke tay mendo ke vera Sûrîye sebrê ma serşino.''

2ê Teşrîna Verên a 1998: Artêşa tirke xeta Hatay, Kilîs û Dîlokî ya sînorê Sûrîye de amadekarîya xo ya leşkerî zafêr kerd.  Serekê  Fermandarîya Pêroyî yê Tirkî Orgeneral Huseyîn Kivrikoglu zî çapemenî de eşkera kerd ke vera Sûrîye şerêko nêameyo îlankerdene esto.

3ê Teşrîna Verên a 1998: Mabênê Anqara-Şamî de aktorêko nêameyene pawitene dewre de yo. Serekkomarê Misirî Husnu Mubarek semedê destgirewişê rewşa Tirkîya Sûrîye şi Suudî Erebîstan. Mubareko ke Kral Fahd reyde pêvînayîş kerd wina vatêne: ''Ma xîret kenê tengijînê Anqara û Şamî bigerê binê kontrolî. Semedê naye destê ma ra çi bêro, ma do bikerê.''

4ê Teşrîna Verên a 1998: Xora dîngê dîyinî yê Mubarekî Şam bi. Mubareko ke Serekê Dewlete yê Sûrîye Hafiz Esat reyde di saetî pêvînayîş kerd bê zanayîş dayîşê çapemenî Sûrîye ra agêra. La Wezîrê Karanê Teberî yê Misirî Amr Musa Sûrîye de mend û vat ê xîret kenê ke semedê çareserkedişê problemî berê dîyalogî bêrê akerdene.

5ê Teşrîna Verên a 1998: Mubareko ke rolê mabênçîye girewt şi Anqara. Hema ke o meydanê teyarayan de bi Serekê Tirkî Mesut Yilmazî vat: ''Ma Sûrîye ra Abdullah Ocalan û terorîstanê bînan wazenê.''

6ê Teşrîna Verên a 1998: Demîrelo ke Mubarek dir ame têhet derheqê waştişanê înan ê Sûrîye de dosyayêke daye ci dima ra vat: ''Eke waştişê ma merê ca ma do çîyêko hewce keno bikerê.'' Mubarekî eynî roje televîzyonê Misirî rê wina qisey kerd: ''Ma semedê çareserkerdişê problemanê Sûrîye û Tirkîya fîkê xo vatî.''

7ê Teşrîna Verên a 1998: Keştîyêka Amerîka ya ke  fuzeyê tomahawkî  barkerdebî şiyî kişta Dengizê Sipî. Eynî roje baregehê Încîrlîkî yê Amerîka de xeylêk teyareyê şer û leşkerî ameyî war.

8ê Teşrîna Verên a 1998: Semedê çareserkerdişê krîzê Anaqara-Şamî narey dorê Îranî bî. Wezîrê Karanê Teberî yê Îranî Kemal Harrazî ke verî şi Şam saetanê şanî de kewt rayîrê Anqara. Goreyê çapemenîya tirkî Demîrelo ke Harrazî reyde pêvînayîş kerd vat: ''Paştî medê Sûrîye, şima zî zirar vînenî.''

Amadekarîya leşkerî û tatbîqatê NATOyî

Ê rojanê ke mabênê Anqara-Şam de nê averşîyayîşî qewimîyayene, Dengizê Sipî de çîyêko baldar bi. 3ê Teşrîna Verên a  1998î de 11 welatanê NATOyî tatbîqato bi nameyê “Dynamic Mix 98” yo ke beşê Tirkîye qet plan de çînêbi nizdê sînorê Sûrîye Îskenderun de dabi destpêkerdene. 2 hezar û 500 leşkerê Pîyadeyê Dengizî û Hêzanê Dengizî yê 2. yê Amerîka Îskerun de ameyî cakerdene. Goreyê xeylêk çimdaran no amadekarîya şerê verê Sûrîye bi ke NATO tede ca girewtene. Rayberê Şarê Kurdî Abdullah Ocalanî ke nê qewimîyayîşî ferq kerdî, 9ê Teşrîna Verêne de do Sûrîye ra bivejîyayêne. Çi ecebo ke û tatbîqat zî 15ê teşrîna verêne de qedîya û leşkerê Amerîka peyser ancîyayî.

Vengdayîşê 'Semedê cînayetê Palme cigêrayîş bikerê'

Rayberê Şarê Kurdî ke bi rayîrê hawayî Şamî ra vejîya û hewteyêk ci ra xebere nêameye girewtene 15ê teşrîna verêne de bi telefonî MED TVyî de qisey kerd. Ocalanî bale ante ser ke Komployê 9ê Teşrîna Verêne û komployo ke 1986 de badê mirênayîşê Serekwezîrê Swêdî Olaf Paylm vera Têgêrayîşê Azadîye yê Kurdî kewt dewre pabeste yê. Ocalanî vat: ''Bizanayîş kiştişê Palme û dima ra sûcdarkerdişê kurdan karê Gladîo bi. Mesela vat 'Talîmat Apoyî ra ame.' Tasfîyekerdişê Palmeyî muhîm bi hema zî cînayetê ci nêameyo eşkerakerdene. Cara eşkera nêkenê.' Serran ra dima ama eşkerakerdene ke eleqaya PKKyî pê cînayetê Palme çîn a. Hezîran a 2020î de serdozgerîya Swêdî da zanayene ke qetilkarê Palme Stîg Engromo ke serra 2000î merd.

Cayo ke ez tede bîya do biameyênê bombardumankerdene

Ocalanî eynî qiseykerdişê xo de deheqê 9ê Teşrîna Verêne de nê vatî: ''Heme amadekarîye şerî semedê min ê. Rojnameyan sername eşt bi 'Ya Apo, ya şer.' Her çî amebi mi de kilit bibi.  9ê Teşrîna Verêne de bombardiman bîyene û semedê naye nuqta û saet lazim bî. Mesut Yilmaz vat: 'Qedîya, na hîşyarîya peyên a.' Meclîsî ra zî qerar ame girewtene. Ma tay dostan ra cayê xo vatbi. Ez nêvana ez înan ra şikdar a la ma derheqê ci de cigêrayîş kenê. Nînan sozê ke daye ma nêardî ca. Mi zî cayê ke înan vîjnayî qebul nêkerdî. Boya komployî tira ameyêne. Di cayî vîjnayî bî seba ke ma şîyayîşê nê cayan qebul nêkerd plan rayra nişî. Ez naye zî eşkera vejî; eke ê saetan de sey pawitişê înan bibînê no semedê Rojhelatê Mîyanênî bîyêne şerêko newe. Cayo ke ma tede bî  (Înan vatêne qey Sûrîye ya) do bobarduman bikerdêne.

Planê byî yê komplokaran înterpol bi

Abdullah Ocalanî ard ziwan ke seba ke cayê ci nêame tesbîtkerdene fuzeyî nêameyî eştene û wina vat: ''Nika reyna ceribnenê, wina qerardar ê.'' Hêzanê ke Komployê 2ê Teşrîna Verêne organîze kerd vejîyayîşê Sûrîye zî hesab kerdbi. Coka semedê Rayberê Şarê Kurdî bi qodê 'lezgîn' qerarê  bultenê sûrî yê Înterpolî vetbi. Abdullah Ocalanî derheqê bultenê  sûrî de wina vatêne: ''Qey yewna roje nê, ewro no qerar gerîya? No ispatê Komployê Mîyanneteweyî yo. Nê tarîx de tay îstîkametê ma estê. Eke şirê ûca do bêro bobardumankerdene, nê eke şirê tîya warê îterpolî yê. Yanî  qewimîyayîşo ke ez vana xîretkerdişê se ra 99 planêko vejîyayîşê ci çîn o, no yo.

Dengizê Sipî ra heta hududê Sûrîye fuzeyî ameyî cakerdene. Zaxo de des hezar leşkerî ameyî cakerdene. Yew zî  xayînanê PDKyî dest pê hêrişê Zaxo kerdbi. Wina tedbîr girewtî. Nê heme belge yê. Ma şirê kam welat ûca tepişyenê. Pekî ma şina ça? Semedê înan ra xelisyayîş mela ma şire feza. Ihin yew komployo ke qet şansê xelisyayîşî çîn o.''

Rayberê Şarê Kurdî eynî qiseykerdişî  de wina qala xelisyayîşê xo kerdêne: ''Elbet her çî sey planê înan nêbeno. Destê înan de çend teknîk bibo zî, eke merdim baldar bo rayîrêkê vejîyayîşî vînîyeno. Ma ciwîyenê û têkoşînê xo do pêtêr bidê domnayene. Bi şuxulnayîşê heme butçeyê xo qaçîko mi mirênenê, mi tepişenê. Şarê Tirkîya hend da war, hema zî peyê mi de yê. Ne qaîdeyê eşîran de ne zî demê yamyaman de wina bi.''