Qeyûmê talankerî yê Wanî vaya awe se ra 43 kerde zêde

Dima ke Şaredarîya Wanî ya HDPyî ameye xespkerdene qeyûmê Wanî vaya awe se ra 43 kerde zêde. Wanijî vanê ke qeyûm înan talan keno.

Qeyumo ke 19ê tabaxa 2019î de dest na Şaredarîya Wanî ser bi zêdekerdişê vayan dest pê kar kerd. Qeyûmo ke verê cû vaya resnayîşî kerdbi zêdêr û kesê ke deynê awe nêdayêne dabi mehkeme nika zî vaya awe se ra 43 kerde zêde.

Wan de bêkarîye se ra 80 a, şar vera xizanîye û bêkarîye xo ver dano. Serra 2011î de dima ke erdlerzo pîl ame meydan û serra 2016î û 2019î de zî qeyûman dest na Şaredarîya Wanî ser şarê Wanî hetê ekonomîkî ra hîna zêdêr tengasîye anceno. Bi hezaran esnafanê Wanî krîzê ekonomîkî ra dikanê xo padayî, bi hezaran esnafî zî rastê îcrayî ameyî. Qeyûmî bi hezaran kesî karî ra vetî û hukmatê AKPyî zî bazirganîya sînorî qedexe kerde. Heywandarîya ke çimeyê debarî yê bi hezaran kesî ya bi qedexekerdişê wareyan û merayan hema hema qedîyaye.

Roniştoxê Wanî îfade kenê ke dewlete têna talan kena û vanê: "Çîyo ke ma bidê dewlete hînî nêmend."