Hemserekê PYDyî Salih Muslimî derheqê têkilîyanê Anqara-Şam û kombîyayîşê Riha de ANFyî rê qisey kerd. 

Muslimî pare kerd ke goreyê waştişê Rûsya û weçînayîşanê Tirkîya xîret yeno kerdene ke Esad û Erdogan zereyê yew fotografî de biasê la no çi do fayde nêkero. Muslimî vat: ''Her kes zaneno ke 2010 ra dima mabênê Erdoganî û Esadî de çi qewimîyayo û înan se vato. Rejîmê Sûrîye û Tirkîya seyci yê. Nika mabênê Erdogan û Esadî de zewajo bizor yeno kerdene. Şêwirmendê AKPyî Yasîn Atayî çend rojî verî vatbi ke 'Seba pêvînayîşî bêrê kerdene ganî ma qetî Heleb bivisnê destî.' Reyna qala destvistişî, îşxalî yena kerdene. 

Ewropa, Amerîka û hêzê mîyanneteweyî yê bînî têkilîya DAÎŞî ya bi Tirkîya zanenê. Ma hêrişanê 19-20ê teşrîna peyêne de dî ke Tirkîya hêrişê zîndanan û kampanê ke tede cergê DAÎŞî tepişîyenê kerd. Reyna Tirkîya o çax  hêrişê hêzanê Koalîsyonê Mîyanneteweyî zî kerd.''

Muslimî pare kerd ke tay eşîrê Sûrîye serkêşîya MÎTî de Riha de ameyê pêser û vat: ''Nê kesî serkêşê eşîran nîyê, rayber nîyê. Nê kesî opurtunîst ê. 5-6 serrî yo ma xîretanê winayênan vînenê. No organîzasyonê MÎTî do bênetîce bimano. Xora nînan ra xeylêk kesî poşman bîyê û agêrayê. Meseleya Sûrîye teyna bi sûrîyeyîjan çareser bena. Seba ney zî ganî sûrîyeyîjî ganî bi hawayêkê azadî qisey bikerê. Ganî îradeyê înan azad bibê, kesêkî ra ferman nêgêrê. Mîsal hêzê sey Tirkîya Sûrîye de se kenê. Coka eke sûrîyeyîjî azad nêbê çareserîye zî nêbena. Seba cuyêka hempare çi hewce bikero ganî ma pîya bikerê. Sey PYD û Îdareyê Xoserî bira ma destê ma de ya. Ma goreyê fermanê kesêkî tênêgêrenê.''

Salih Muslimî da zanayene ganî rejîmê Şamî înan de qisey bikero û vat: ''Şarê Sûrîye ganî her ca de bi îradeyê xo wurzê we. Seba haştîya zereyî çi hewce bikero ganî ma bikerê. Nika proses seba sûrîyeyîjan zaf eşkera nîyo. Eke ma çimanê xo anêkerê, bala xo nêdê prosesî ser ma do her çî vînî bikerê.''