Sancare: Eke ma bêrê yewca xirabîye werte ra wedarîyena

Hemserekê Pêroyî yê HDPyî Mîthat Sancar alîman reyde kom bi û vat: ''Heta ke edalet nêro caardene holîye nêna.'' Sancarî ard ziwan ke peynîya îqtîdarî ameya û vat: ''Eke ma bêrê yewca ma eşkenê xirabîye werte ra wedarê.''

Hemserekê Pêroyî yê HDPyî Mîthat Sancar çarçewa Bernameyê Edaletî de alîmanê misilmanan reyde kombi. Kombîyayîşî ra verî Sancarî na eşkerayîye daye:

''Ma zanenê welat rewşêka xirabe de ya. La ma seba holîya welatî xebitîyenê. Pênaseyanê holîye ra yew zî edalet o. Eke edalet nêro caardene holîye zî nêna. Coka ganî ma xo hol rêxistin bikerê. Ma zanenê ke Îslamîyet qîmetêkê pîlî danê edaletî. Eke merdim edaletî ra fek veera bido hînî bawerî ra zî fek vera dano.

Eke ma dormeyê edaletî de bêrê yewca ma do bieşkê zulmî zî çin bikerê. Partîya ma seba naye têkoşîn kena. Ma zanenê ke ferasetê Îslamê Demokratîkî biqîmet o. Komîsyonê Şaran û Bawerîyan ê ma heta nika 9 herêman de kombîyayîşî kerdî û nê kombîyayîşan de alîm, seydayan reyde ame têhet. No kombîyayîş zî ma rê zaf ercîyaye yo. 25ê adare de ma ko kombîyayîşê Edaletê Pîlî bikerê. Ma nameyê nê kombîyayîşî zî kerd Îslam û Edalet.

Eke edalet çinbo haştîye zî çin a. Coka ganî edalet bêro xurtkerdene. Ferasetê ma yê çareserkerdişê meseleyan dîyalog, muzakere, cigêrayîşê heqîqatî yê. Ma wazenê wina meseleyanê komelî çareser bikerê. Nê têkoşînî alîmê ercîyayeyî zî estê.''