Serhed û Garzan de 21 leşkerî ameyî kiştene

Gerîlayanê HPG û YJA-Starî Serhed û Grazan de derbêka girde daye îşxalkaran ro. Nê çalakîyan de bi qasî ame zelal kerdene 21 leşkerî ameyî kiştene. Wesayîtêkê kîrpî û amarog ame îmhakerdene û tankêk zî ame derbkerdene.

Merkezê Îrtîbat û Çapemenîye yê HPG'yî derheqê çalakîyanê gerîlayan ê Serhed û Garzanî de eşkerayîyek kerde.

Eşkerayîya HPG'yî wina ya:

Heftenîn

"Çalakîyê hêzanê ma yê çarçeweya Hemleya Cengê Heftanînî ya Herêma Heftenîn a Herêmanê Pawitişî yê Medya de dewam kenê. Na çarçeweye de:

19'ê Teşrîna Verêne verba wesayîtanê artêşa Tirkî yê derdorê Girê Partîzan de 2 çalakîyî ameyî viraştene. Nê çalakîyan de wesayîtê kepçe ameyî desbkerdene û hûmara leşkeran ê kişteyan û birîndaran nêameye zelalkerdene. 20'ê Teşrîna Verêne hêzanê ma verba hêzanê îşxalkaran ê ke Girê Partîzan de ca bîyî çalakîyêk viraşte. Na çalakîye de çeper û mewzîyî ameyî destfînayene, hûmara leşkeranê kişteyan û birîndaran nêameye zelalkerdene.

Colemêrg

Hêzanê ma çarçeweya Hemleya Şorişgêrîye ya Şehîd Bager û Şehîde Ronya de, 20'ê Teşrîna Verêne verba yewîyanê artêşa Tirkî yê Girê Xeregolî ya qezaya Çelê ya Colmêrgî de çalakîyêke viraşte. Na çalakîye de ke mewzî û çeperê dişmenî ameyî destfînayene, hûmara kişte û birîndaran nêameye zelalkerdene.

Agirî

Hêzanê ma çarçeweya Hemleya Serkewtişî ya Şorişgêrî ya Eyaletê Serhedî de 20'ê Teşrîna Verêne verba wesayîtê amarog û wesayîtê zirxî yê kîrpî qereqolîra vejîyayo û kozikê nobede yê Qereqolê Vedat Ozkayayî yê pabesteyê qezaya Bazîdî ya Agirî operasyonêkê şorişgêrî ameye destpêkerdene. Na çalakîye de ke 3 baskan ra dişmen bi tesîr ame pirodayene, wesayîtê zirxî û amarog ameyî îmhakerdene û tankêkê qereqolî zî ame derbkerdene. Çalakîye de 18 leşkerê Tirkî ameyî kiştene. Yewîyê ma yê çalakîye bi saxî û selametîye agêrayî cayanê xo.

Bedlîs

20'ê Teşrîna Verêne wareyê Şehîd Mizgîne yê Bedlîsî de mabênê hêzanê ma û îşxalkaran de şer qewimîyayo. Pêkewtişan de xeylî leşkerê Tirkî ameyî kiştene û birîndarkerdene, la hûmara înan nêameye zelalkerdene. Hêzanê îşxalkaran dimayê çalakîye ware de dest pê operasyonêkî kerd. Hêzanê ma 21'ê Teşrîna Verêne yewîyêka operasyonî hedef girewt. Na çalakîya ke dişmen nêzdîye ra ame  pirodayene de 3 leşkerî ameyî kiştene, xeylî leşkerî zî birîndar bîyî. Dimayê çalakîye îşxalkarî destveng herême ra anciyayî."