Gerîla Hawar Sînê ke şaristanê Sînê yê Rojhilatê Kurdîstanî ra yo ard ziwan ke Îran polîtîkayêka leymine ano caardene û ciwanan ra waşt ke wa nayî pûç vejê.

Hawar Sînê bale ante tarîxê xovedayîşî yê Sînê ser û vat: ''Şaro xoverdayox ê Sînê tim raştê zext û qirkerdişanê dişmenî ame. Dişmen tim wazeno ke potansîyelê xoverdayîşî yê Sînê bimirêno la şarê Sînê çirey verê dişmenî de milê xo çewt nêkerd. Seba ke dişmen pê hêriş û qirkerdişan nêresa waştişanê xo nika polîtîkayêka nerme ya leymine fînaye dewre ke ganî vera nayî şar hîşyar bo. Mesela nika vanê ma sorankî serbest kerda û şarî xapînenê.  Şarî pê ziwanê ci asîmîle kenê. Tarîx, polîtîka û kulturê sîstemî bi ziwanê şarî danê şarî musnayene. Tay hetî vanê qey dişmenî heqê înan dayo. La gereka bêro zanayene ke dewlete wazena ke bi nê tewirî ruhê xoverdayîşî yê kurdan çîn bikero û sîyasetê xo ci rê bido qebulkerdene.''

Gerîla Hawar Sînê yî vist vîrî ke sîstemê qoricîyîye çend şino aver beno û hînî sey çîyêkê normalî ramojneno û vat: ''Îranî qorucuyîye hende kerd normal ke hînî her keye seba ke domananê xo rê kartêkê qorucuyîye bigero kewenê rêz. Dewlete vana heta ke no kart çînêbo şima nêeşkenê qet cayêkê sîstemî de kar bivînê, bixebitê û biciwîyê. Nê zî şar biney kerdo mecbur. Keyeyê ferqê ci de yê pê qoricîyîye domananê xo re çi kenê? Hema qicê mezgê înan de îdeolojîyê dewlete yeno cakerdene. Hema ke qico  museno dewlete rê gerreyê dadî û babîye xo bikero. No asîmîlsyono tewr xorî yo.  Dewlete bitaybetî cayanê sey Sînê yê xoverdayoxan de wina kena. 20 serî verê cu eke sînêyîjêkî rê ajan biameyêne vatene qiyamet ameyêne. Seba ê kesî merg bi. Şarî selam ci nêdayêne. Nika bîyo normal ke kartê ci yo fermî zî esto. Gerekê sere de cinî û ciwanî şarê Sînê vera nê kayan hîşyar bo. Qoricîyîye bi anorê kurdan kaykerdiş o.''