Bedlîs de helîkoptero leşkerî kewt: Yewê înan korgeneral 11 leşkerî merdî

Qezaya Tûxî ya Bedlîsî de helîkoptero leşkerî kewt. Goreyê çimeyanê dewleta tirke tewr tay 11 leşkerî merdî. Înan ra yew Korgeneral  Osman Erbaş o.

Herêma Rahova ya Qezaya Tûxî ya Bedlîsî de helîkoptero leşkerî kewt. Goreyê eşkerayîyanê  peyênan ê selahîyetdaranê tirkî kewtişê helîkopterî de 11 leşkerî merdî 2 leşkerî zî birîndar bîyî.

Wekîlê AKPyî yê Xarpêtî Tolga Agarî hesabê xo yê twîterî ra da zanayene ke leşkerê ke merdî înan ra yew Fermandarê Artêşa  8. ya Xarpêtî Korgeneral  Osman Erbaş o.

Xeylêk ekîbê weşîye yê AFADî sewqê cayê qewimîyayîşî bîyî. Derheqê sebebê kewtişê helîkopterî de zanayîş nêgerîya.