Vakur de qestî ra tedbîrê Korona nênê girewtene

Vakurê Kurdîstanî de nêweşê vîrusê Korona zêdîyenê. Amed de 346 kedkarê weşîye pê vîrusî kewtî. Dewleta tirke qestî ra Vakurê Kurdîstanî de vera vîrusê Korona tedbîran nêgêna.

Dima ke 1ê hezîrane de gamê 'normalîzebîyayîşî' ameyî eştene vîrusê Korona zêdêr vila bi û yeno vatene ke pêlo diyîn do nêzdî de bêro.  Bi taybetî Cizîr û Amed de hûmara nêweşanê Korona zaf zêdîyaye û babete medya de zî ca girewt. 

Tewr peyên Platformê Weşîye yê Amedî pare kerd ke 6ê tebaxe ra nata 346 kedkarê weşîye pê vîrusê Korona kewtî. 

Yewîya Tabîban ê Tirkan ra Onkolog Doktor Halîs Yerlîkayayî ANFyî reyde qisey kerd û îfade kerd ke Amed û şaristananê bînan ê Vakurê Kurdîstanî de hûmara nêweşan zêdîyaye û rewşa înan hol nîya. 

Doktor Yerlîkayayî vat: ''Amed de her roje 300 nêweşê ma benê. Tay nêweşxaneyî têna servîsê lezabezî de derman danê nêweşan û înan şawenê. Wexto ke rewşa înan bena giranêr reyna yenê nêweşxane. Hem karantîna hem zî nêweşxaneyan de xeylêk nêweşî estê.''

Yerlîkayayî bale ante ser ke Vakurê Kurdîstanî de merdimî terkê qederê xo bîyî û hukmat goreyê krîteranê weşî û zanistî tênêgêreno. Yerlîkayayî vat 1ê hezîrane ra naya hukmatê tirkî weşîya komelî ra zêdêr ekonomî ra qerqilîyeno û coka hûmara nêweşan Vakurê Kurdîstanî de zêdîyena.