4 parçeyan Lozan ra veng da: Ma hînî yewîya xo awan bikê!

Gama yewîne ya rayraşîyayîşê yewîya neteweyîye ya kurdan Lozan-Cenevre qedîyaye. Beşdaranê rayraşîyayîşî venga partîyanê kurdan da ke seba awankerdişê yewîya neteweyî tê bigêrê û mesajê ''Seba ke seserrêka bîne wa vînî nêba ganî ma yew bibê." da.

Bi tewrbîyayîşê bi seyan kesanê 4 parçeyanê Kurdîstanî yê ke tede sîyasetmedarî, nuştoxî, rojnamegerî, akademîsyenî, dezgehî û temsîlkarê partîyan estê rayraşîyayîşê yewîya neteweyî yê Lozan ra heta Cenevre dest pêkerd. Gama yewîne ya rayraşîyayîşî qedîyaye. Beşdaranê rayraşîyayîşî bale ante ser ke yewîya neteweyîe bi lezabezî bêra caardene û derheqê na babaete de venga partîyanê kurdan da ke berpirsîyarîya xo bica bîyarê.

Gama yewîne ya rayraşîyayîşî vizêr verê bînaya Place de Riponne de ke peymana Lozanî tede amebî îmzakerdene dest pêkerd û şaristanê Renensî de qedîyaye. Rayraşîyayîşî de bêmabên sloganê ''Biciwîyo yewîya şarê kurdî'' û ''Vera îşxalan Rojawanî bipawê'' ameyî vatene. Dima ke gama yewîne ya rayraşîyayîşî qedîyaye çend beşdaranê rayraşîyayîşî girîngîya rayarşîyayîşî ser o qisey kerd.

Hunermend Xelîl Xemgînî seba awankerdişê yewîya neteweyî ya kurdan venga partîyanê kurdan da û vat: "Ma vera serewedaritişê domananê kurdan ê Rojawanî ganî vajê ke hînî bes o û yewîya xo awan bikê. Eke nê prosesî de ma nêbê yew ma do nêeşkê ke yewîya kurdan awan bikê. Ma sey şar û hunermendanê kurdan her dewe û şaristan de  bêrê têhet û îtîfaqê xo ronê. Ma seba ke partîyê sîyasî yewîye awan bikê têbigêrê. Dişmenê ma her çiqas yewbînan zî kişenê û nêeşkenê pêbikê zî wexto ke babete kurd biba benê yew. Ma çira nêeşkenê yewîya xo awan bikê, ma seba naye rîca kenê. Hînî ma qêrîyayîşê domanan û hawara dadîyan nêeşnawê. Hînî roje roja namusî ya, roje na roj a."

Dima hemwelatîyê Başûrê Kurdîstanî Kardo Adilî derheqê boykotkerdişê dewleta tirke de qisey kerd û venga her kesî da ke tewrê na hemle bibo. Adilî vat: "Oyo ke şarê kurdî qirkerdişan û îşxalan ra do bixelisno yewîya neteweyî yo."

Hemserekê Meclîsê Dîaspora yê Şengalî Fîkret Îgrekî zî qisey kerd û vat: "Vera qirkerdişan û qatlîamanê ke bi hawayêkê xurtî vera şarê kurdan yenê kerdene têna rayîrêk esto ke awankerdişê yewîya neteweyî yo. Çew nêeşkeno xo nê wezîfe ra dûr bigêro."

Beşdarî qiseykerdişan ra dima derbazê salona pêramotişî yê Renensî bîyî. Salone de derheqê yewîya kurdan de panelêk ame serûberkerdene û dima hunermendan hunerê xo pêşkêş kerdî.