Şaredarîya Dêrsimî ke hetê DEM Partî ra yena îdarekerdene û Şaredarîya Pulurî ya ke hetê CHPyî ra yena îdarekerdene  ameyî xespkerdene. Şaro ke verê şaredarîya Dêrsimî de vizêrî ra nata nobete girewtêne bi zorbazî ame teberkerdene.

Dima ke cezaya zîndanî ya 6 serran û 3 mengan dîyabî Hemşaredarê Dêrsimî Cevdet Konakî verê şaredarîye de vera îxtîmalê xespkerdişî nobete dîyabî destpêkerdene. Hetê bînî ra Şaredarê Pilurî yê CHPyî Mustafa Sarigulî rê zî cezaya zîndanî dîyabî.

Wezîrîya Karanê Zereyî yê Tirkî herinda Hemşaredaranê Dêrsimî Cevdet Konak û Birsene Orhan de Walîyê Tuncelî Bulent Tekbiyikoglu û herinda Şaredarê Pulurî Mustafa Sarigulî de qeymeqamê qeza Huseyîn Şamil Sozen tayîn kerd.

Bi seyan kesê ke verê Şaredarîya Dêrsimî de ameyî têhet barîkatê polîsan rijnayî. Naye ser o hûmara polîsan zêdîyeye û barîkatî newe ra ameyî ronayene.

Hemşaredar Cevdet Konakê ke verê şaredarî de qisey kerd, ard ziwan ke polîsan trafîk girewt û ey ra waşt wa teblîgatî îmza bikero la ey îmza nêkerdo. Konakî vat: ''Şarê Dêrsimî no selahîyet dayo ma. Înan bajar îşxal kerd. No fotografê AKP-MHPyî yo. Xespkerdişê îradeyî no yo.''