Dewleta tirke bi hawayêkê sîstematîkî cenazayanê gerîlayan rê îşkence kena, hêrişê goran kena. Tewr peyên serra 2015 de Wan de leşkeranê tirkan cenazaya Haci Lokman Bîrlîkî rê îşkence kerdbi û tay kesan hêrişê cenazaya dadîya Aysele Tugluk Hatune Tugluk kerdbi.

Merkezê Vîrî ra Ozgure Sevgî Gorala ke Zanîngeha Parisî de cigêrayox a hêrişê dewleta tirke yê vera gor û cenazayan ANFyî rê ercnayî.

Ozgure Sevgî pare kerd ke nê hêrişî bingeyê xo polîtîkaya îslamîst-neteweperwere ya îqtîdarî ra gênê. Ozgure Sevgî hêriş vera cenazaya Hatune Tugluk, cenazaya Taybete Înan, Azîz Yural, diznayîşê cenazayanê Goristanê Garzanî û îşkenceyê vera cenazayanê gerîlayan vistî vîrî.

Ozgure Sevgî vat: ''Cenazayî bi mengan Dezgehê Tipê Edlîyî de yenê vindarnayene, binê çimdarîya hêzanê dewlete de cenazayî yenê definkerdene, gor û kerrayê gorî yenê texrîbkerdene. Nê hêrişî nê çîyan armanc kenê ke vîro komelkî çin bikerê, kurdan rê gef biwanê, bitersnê û rûmetê kurdan binpay bikerê. Dewleta tirke ronayîşê xo ra nata nê hêrişan kena. Tarîxê Komare de gorê elewî û armenîyan ameyî texrîbkerdene, rayberê kurdî bêgor vera dîyayî. Dewlete bi taybetî serranê 90an de vînkerdişî sey caardişê serdestîya xo xebitnayî.  Dewlete nê serran de teda, îşkence, vêşnayîşê dewan, vînkerdiş û qetilkerdişî sey polîtîkaya asayîşî ardî ca. Goreyê doneyanê Merkezê kesê ke hetê dewlete ra dîyayî vînkerdene zafê nînan nêdîyayî.''

Ozgure Sevgî eşkera kerd ke dewleta tirke de tradîsyonê şîdetî verî ra estbî û vat: ''Hêrişê vera cenaza û goran rojawanê Tirkîya de peygoş û tesdîq benê. Heta nê kerdişî sey meşrû dîyenê û şar paştî dano ci. Xora nê kerdişî hem pabesteyê kolonyalîzmê dewleta tirke yê hem zî pabesteyê polîtîkaya şîdetî yê. Eke vîr wazeno bibo warêkê têkoşînî ganî nê hêrişanê vera gor û cenazayan ser o bifikîro. Ganî ma verî nînan fam bikerê.''