Cizîre de leşkeran hêrişê dewijan kerd: Birîndarî est ê

Dewekanê Newala Îsaaxayî û Zuran de dewijan vera pakerdişê hûmarkeranê ceyranî nêrazîbîyayîşê xo mojna. Naye ser o leşkeranê tirkan hêrişê dewijan kerd û dewijî birîndar kerdî.

Goreyê agahîyanê ke ameyê girewtene dewa Dîrseklî de tîmanê Şîrketa Vilakerdişê Ceyranî (DEDAŞ) xîret kerd ke hûmarkeranê ceyranî yê dewekanê Newela Îsaaxa û Zûranî dîrekan ra pa bikerê. Naye ser o mabênê tîmanê DEDAŞî û dewijan de nîqaş qewimîya.

Cendirmeyî bi wesayîtanê zirxînan û TOMAyan kewtî dewe û înan hêrişê dewijan kerd. Goreyê agahîyan tay dewijî hêriş de birîndar bîyî.