Bado ke Şaredarîya Dêrsimî ke hetê DEM Partî ra yena îdarekerdene û Şaredarîya Pulurî ya ke hetê CHPyî ra yena îdarekerdene  ameyî xespkerdene her warê bajarî açarîya warê xoverdayîşî.

Şaro ke badê xespkerdişî verê şaredarîye de ame pêser hetê polîsan ra raştê hêrişê bombaya gazî û awa tazîkîne ame. Vera hêrişê polîsan şarî kuçeyan de adir nata û barîkatî nayî ro.Ciwanê ke heme kuçeyanê bajarî ra vila bîyî xoverdayîşî rê dewam kenê.

Hemsereka Pêroya ya DEM Partî Çigdeme Kiliçgun Uçar zî ameye Dêrsimî. Badê ameyîşê Çigdeme Kiliçgun Uçar banê DEM Partî yê Dêrsimî de kombîyayîş ame kerdene.

Çigdeme Kiliçgun Uçar hesabê xo yê medyaya sanale de bi kirmanckî eşkerayîye daye û wina vat: ''Dêrsim de îradeyê sarî reyna bi destê îqtîdarê AKP-MHPyî yê xespkerî ame diznayene. Ma nê polîtîkayanê qayûmî yê despotîkan qetî qebul nêkenîme û şermezar kenîme. Tayînkerdisê qayûmî çinkerdisê kultur, edet, zon û vîrê Dêrsimî yo. Seba ma têna îradeyê sarî esasî yo.''

Hemserekê Pêroyî yê DBPyî Keskin Bayindirî zî hesabê xo yê medyaya sanale ra wina vat: ''Senî ke 100 serrî verî Dêrsim de qirkerdiş kerd ewro zî wazenê bi qeyûmî eynî çîyî bikerî. Wa îqtîdarê AKP-MHPyî bizano ke no şaro ke ê îradeyê ci nas nêkenê do peynîyê saltananê înan bîyaro.''