Fransa de dewleta tirke ameye şermezarkerdene

Bajaranê Marsilya û Marignane yê Fransa de tecrîdê serê Rayberê Şarê Kurdî Abdullah Ocalanî û şuxulnayîşê çekanê kîmyewîyan ameyî şermezarkerdene.

Bajaranê Marsilya û Marignane yê Fransa de endamanê Têgêrayîşê Ciwanan ê Şorişgêran (TCŞ) û endamanê Cinîyan ê Ciwanan ê Têkoşeran (TekoJIN) çarçewa Hemleya Werin Cenga Azadîye de çalakîye kerde.

Marsilya de ciwanan pê rayraşîyayîşêkî tecrîdê serê Rayberê Şarê Kurdî Abdullah Ocalanî û vera gerîlayan şuxulnayîşê çekanê kîmyewîyan şermezar kerdî. Ciwanê ke saetanê veraşanî de Meydanê Belle de Mai de ameyî têhet pê pankart û sloganan bale ante tecrîd û çekanê kîmyewîyan ê ke dewleta tirke vera gerîlayan şuxulnena ser. Badê rayraşîyayîşî eşkerayîye ameye dayene û veng dîya welatanê NATOyî ke wa çeke meroşê dewleta tirke ya  ke pê şuxulnayîşê çekanê kîmyewîyan sûce şerî kena. Ciwanan veng da şarê kurdî ke wa vera tecrîdî vejîyo paştî bido têkoşînê gerîlayan.

Marignane de zî ciwanan meydanê teyarayan ê Aéroport Marseille Provence de çalakîya bêîteatîya sîvîle kerde û bale ante sûcanê şerî yê dewleta tirke ser. Çalakîya ke saetak ameye domnayene de bi sloganan hêrişê dewleta tirke yê vera kurdan ameyî şermezarkerdene.