Hem-vervatoxê TUAY-Derî: Weşîya çalakwanan bena xirabe

Hem-vervatoxê TUAY-DER’î Abdulmenaf Kurî bale ante serê çalakîyanê grevê vêşanîye û vat, “Halê weşîye yê çalakwanan çende şino beno xirab. Ganî seba ke zîndanan ra xeberê mergî nêrê tavilî gamî bêrê eştene.”

Çalakîyê grevê vêşanîye yê ke 8’ê Mijdar a 2018’î ra bi serkêşîya Leyla Guvene dest pêkerdîbî ewro bi tewrbîyayîşê hezaran kesan dewam kenê. Xusûsen tepişteyê PKK û PAJK’î yê ke zîndananê Kurdistan û Tirkîya de yê çalakîya xo de kewtê roja 127’ine. Weşîya nê tepişteyan roje bi roje hîna bena xirabe. Çalakwanî vanê heta tecrîd nêro wedaritene ê do çalakîya xo nêqedînê.

Hem-vervatoxê Komeleya Hetkarî û Paştdayîşî ya Keyeyanê Tepişteyan (TUAY-DER) Abdulmenaf Kurî derheqê halê tepişteyan û keyeyanê înan de ANF’yî rê qisey kerd.

Kurî vat keyeyî hemverê polîtîkayanê tecrîdî de bihêrs ê. Ganî seba ke zerrîya mayan bibo asane tavilî gamî bêrê eştene. Kurî nê vatî: “Zîndanan de tecrîdî ser o tecrîd esto. Gama keyeyî seba pêvînayîşî şinê zîndanan pêhesênê ke cezaya dîsîplînî dîyaya tepişteyan û bê ke domananê xo bivînê û hende rayîrî ra agêrenê.”

Halê Weşîye yê Tepişteyan

Kurî derheqê halê weşîye yê çalakwanan de zî nê vatî: “Xusûsen halê weşîye yê Îlhamî Çinarî yo ke Zîndanê Îzmîr-Şakranî de tepişte yo xirab o. Çimek ê de vînîbîyayîşê vînayîşî virazîyayo. Hetêna ra zî gonî virêjeno. Zîndanê Meletî ra zî xebere amî ke roqirayanê tepişteyêk ra gonî yena. Ame vatene ke ê di tepişteyan zî fek û zincîya înan ra gonî amîya. Zîndanê Rîze de zî problemê winayênî estê.”

‘Ganî Her Kes Hîsdar Bo’

Kurî peynîya qiseykerdişê xo de vat ke keyeyî her roje yenê komele û paştî danê çalakîya domananê xo û ê bi xo zî wazenê ke dest bi grevê vêşanîye bikerê û vat, “Keyeyî na babete de zaf hesas ê. Heta wazenê ke bikewê rojeyê mergî. Vanê ke çi lazim o ma amade yê bikerê. Hewna tam zelal nêyo la rojanê vernîya ma de beno ke bikewê grevê vêşanîye. Xora verî ê qey 3 rojan Baroyê Amedî de kewtîbî grev. Ma wazenê her keso ke xo ra vano ‘merdim’ na babete de hîsdar bo. Ma nêwazenê ke hendî zere ra xeberanê mergî bigêrê.”