''Mûsa Anterî semedê çapemenîya kurdî keda pîle daye''

Huseyîn Aykolo ke redaksîyonê kibatê 'Apê Mûsa 100 serre yo' kerd bale ante serê keda Mûsa Anterî ya seba çapemenya kurdî. Aykolî vat: ''Mûsa Anterî mîrasê Keyeyê Bedîrxanî yo ke semedê çapemenîya kurdî sey çinarêr o, heta ma ard.''

Edîtorîya nuştoxê Rojnameyê Yenî Yaşamî Huseyîn Aykolî de kitabê 'Apê Mûsa 100 serre yo' vejîya. Aykolî derheqê nê kitabî de ANFyî rê qisey kerd.

Aykolî vist vîrî ke 1992  wexto ke Mûsa Anter ame qetilkerdene ra nata ê Xelatê Mûsa Anter û Şehîdanê Çapemenîya Azade  danê û vat: ''Ma bi wesîleyê nê xelatan her serre ey yad kenê. Ma pêro pîya dost û hemrayanê ci o xo vîrî ra nêkerd. Mûsa Anter 2020 de kewt bi 100 serre çoka na serre hîna muhîm bî. Ma derheqê naye de qisey kerdêne. Bitaybetî na babete de tekîlîya ma bi Dîcle Anterî bibî. Ma fikîryayêne ke têna Kurdîstan û Tirkîya de nê Ewropa de zî panel û sempoyumanê hîrayan bikerê. Rîyê pandemî no waştişê nêbi. Ma zî dest pê kitabî kerd. Hezîran de heme vîrameyîş ameyî arêdayene, temmuze de ame amadekerdene, tebaxe de ame çapekerdene û 1ê êlule de weşanîya.''

Aylolî keda Keyayê Bedirxanî û Mûsa Anterî ya semedê çapemenîya kurdî arde vîrî û vat: ''Rojnameyo verên ê Kurdîstanî 1898î de Qahîre de vejîya ke zafê nê hetê Keyeyê Bedîrxanî ra vejîya. Semedê çapemenîya  kurdî Keyeyê Bedîrxanî sey çinarêr o. Vakûrê Kurdîstanî de  de rixmê heme zehmetîyan 1940î ra heta 1970î de çapemenîya kurdî de tim nameyê Mûsa Anterî esto. Anterî ya kovare vete ya zî kovar û rojnameyan de nuşt û paştî da. Esle xo de Mûsa Anterî mîrasê Keyeyê Bedîrxanî heta ma ard.''

Huseyîn Aykolî vat: ''Sere de 1990an de xeylêk rojnamerî ameyî qetilkerdene, hespkerdene û surgunkerdene. Rojnameyî ameyî bombardumankerdene. Rojname ewro bêro bombakerdene ma roja bîne reyna rojnameyî vejenê, ma wina heta ewro ameyê. No mîras bi keda pîle û zehmetîyan heta ewro ame. Ewro zî rojnamegerî yenê muhakemekerdene û tepiştene. Têna ferqêk esto rojnamegerî sey o wextî eşkera nînê kiştene. La mergê ke ma vanê mergê sîvîlî qewimîyene. Rojnameyî yenê qefilnayene, rojnamegerî bêkar yenê mendene. Xora kesanê ke xo dayo nê karî, eke şima înan bêkar verdî senî ke bikişî.

Nika 16 embazê ma zîndan de yê la ma reyna nûqtaya xo de yê, ma xo se mexdur nêvînenê. Sey pabesteyê Têgêrayîşê Azadîye yê Kurdan nika çapemenîya kurdî 10î ra fazêf televîzyon, 6 ajansê xeberan, rojane û hewtanê rojnameyê ma estê. No serkewtiş o. Ma pêro layîqê Keyeyê Bedîrxanî û Apê Mûsa yê. Ma bedelî dayî, danê û do bidê la ma hewcadarîya xebergirewtişî yê şarê kurdî anê ca ma do naye rê dewam bikerê.''