Koyê Cûdîyî de îşxalkeran dest pê operasyonêkî kerd

Artêşa tirke ya îşxalkere herêma Koyê Cûdîyî de pê tewrbîyayîşê hezar leşkeran û destekê hewayî dest pê operasyonêkî kerd.

Dima ke Walîtîya Şirnexî herême de qedexe îlan kerd operasyonê leşkerîyî dest pêkerd. Operasyono ke Koyê Cûdîyî de dîya destpêkerdene, hezar leşkerî tewrê ci bîyî.

Operasyon pê destekê hewayî yeno îdarekerdene. Têgêrayîşê xeylêk helîkopter û teyarayanê keşfî yê bêmerdiman herême de gêrenê.

Operasyonî ra verî 22 herêmanê Şirnexî, qezaya Cizîre û Sîlopî de seba 3 rojan qedexe amebi îlankerdene.