Lotûs: Ma do faşîzmê Erdoganî zî bin fînê

Endamê Komîteya Şehîdan a PKK'yî Orhan Lotûsî vat, “Xoverdayîşê 14’ê Temmuze faşîzmê 12’ê Êlule eşt serê sergoyê tarîxî. AKP-MHP zî demê xo yê peyênî de yê.”  

Endamê Komîteya Şehîdan a PKK’yî Orhan Lotûsî serrgêra 37’ine ya Xoverdayîşê Rojeyê Mergî yê Pîlî yê 14’ê Temmuze ercna.

‘Hêrişî Serkêşîya Mucadeleyî Kenê’

Ercnayîşê Lotûsî wina yo:

“Sere de şexsê embazî Helmet, Devran û Şahînî de ma heme şehîdanê şorişî bi vîr anê. Embaz Helmetî bi cuye, mucadele û xoverdayîşê xo reyna ramot ke xoverdayîş bi ser keweno. Bi cuya xo bi nimûne. Şexsê înan de şehîdanê 14’ê Temmuze Kemal Pîr, Hayrî Dûrmûş, Akîf Yilmaz û Alî Çîçekî bi vîr ana.

Şehîdê 14’ê Temmuze ramot ke bi xoverdayîşî merdimî eşkenê bi ser bikewê. Merdimî eşkenê faşîzmî bin fînê. Ê bîyî beyraqa destpêkî. Beyraqa ke înan kerde berz bi xoverdayîşî resa dereceyêka core, resa dereceyêk ke mucadeleyî bi ser bifîno. Embaz Helmet, şehîdê ma yo tewr peyên o ke dereceya serkêşîye de no mucadele rayra berdêne, serkêşê nê xoverdayîşî bi. Faşîzm, îşxalkarîya Tirkî waşt reyna şexsê embaz Helmetî de mucadeleyî bin fîno, xoverdayîşo ke resayo serkewtişî bi qirkerdişêk werte ra wedaro. No şehîdê ma yo tewr peyên, şehîdêko bierc, biked bi û mucadeleyê xo resna dereceyêk.

‘Xîyanet û Teslîmîyet Ame Vêşnayene’

Embazê Kemal Pîrî binge rona. Binê şertanê tewr zehmetan de tasfîyeya PKK’yî ameyêne pawitene, îşxalkarîya Tirkî waştêne ruhê mucadeleyî, yê xoverdayîşî, ruhê PKK’yî şexsê serkêşanê PKK’yî de bin fîno, bi teslîmîyetî bin fîno û şorişê Kurdistanî û yê Rojakewtena Mîyanêne ke têgêrayîşê Apoyî serkêşîya ci keno, destpêk de bin fînê. Naye ra zîndan de bi metodanê tewr barbaran, bi metodanê teberê merdimîye ke tarîxê merdimîye de nimûneyê ci çinê îşkenceyê zaf giranî ameyî embazanê serkêşan rê ameyî kerdene. Labelê çeqika ke embaz Mazlûm Doganî 21’ê Adare Newroze de tafîna, ke ma ewro zanê bi mîlyonan Newroze pîroz kenê, adiro ke embaz Mazlûmî tafîna xîyanet û tasfîye vêşnayî.

‘Qanûno Bingeyên ê Cuye Xoverdayîş o’

Toxmê ke înan waştêne bi teslîmîyetî, bi xîyanetî ronê, ê toxmî heme ameyî vêşnayene. Bi adirêko pîl, bi PKK, bi ruhê PKK’yî, bi xoverdayîş, bi temsîlê şertanê tewr giranan de xoverdayîşî. Merdim eşkeno xover bido, eşkeno azadîye bica bîyaro. Beyraqa ke embaz Mazlûmî û embazanê 14’ê Temmuze berz kerde, ramote ke xoverdayîş hemverê teslîmîyetî de qetîyen serkewtişî aferneno.

‘Ma do Faşîzmê Erdoganî zî Biqedênê’

Rayberîye vana, ‘Ruhê PKK’yî ruhê xoverdayîşê zîndanan o, ruhê serkêşan ê zîndanan o, embazî Kemal Pîr, Fehat, Necmî heme bîyî binge. Ma eşkenê ‘Çaran’ zî bi vîr bîyarê. Ê embazan zî hemverê teslîmîyetî de adir verda bedenê xo. Teslîmîyeto ke bi zorî, bi îşkenceyî û bi zextê teberê merdimîye înan ser o amebi ferzkerdene înan bi adirê bedenê xo o teslîmîyet qebûl nêkerd. Xo teslîmîyetî ra kerd pak. Ewro reyna hukmatê AKP-MHP’yî yo faşîst bi heman nizdbîyayîşî seba ke PKK’yî bin fîno, seba ke têgêrayîşê umîdê merdimîye bin fîno hêrişê têgêrayîşî keno. Bi nameyê plane ‘Çokronayîşî’ û ‘Çinêkerdişî’ prosesêk da destpêkerdene. Vat, ‘pîyê şima nêeşka ma bin fîno, şima do zî nêeşkê ma bin fînê.’ Ganî rind bêro zanayene ke AKP domanê 12’ê Êlule yo. Kenan Evren, pîyê înan nêeşka nê têgêrayîşî bin fîno, şima do zî nêeşkê. Şehîdê 14’ê Temmuze bîyî tîmsalê na yewe û ramot ke çew nêeşkeno nê têgêrayîşî bin fîno.

Rayberîye vat, ‘xoverdayîşê zîndanî ganî bi giranî hetê felsefîk, îdeolojîkî ra bibo berz.’ Rast o, çalakî zî hetê ziwanê xo ra felsefîk a, îdeolojîk a, xoverdayîş bi ziwano felsefîk û îdeolojîk. Bê çalakî felsefe nêbeno, bê felsefe zî çalakî nêbena. No bi ziwanê neweyî yê xoverdayîşî. Naye ra hukmatê AKP’yî kewt tewa mergî, neçarî ra tecrîdê serê serekîye sist kerd. Çunke nê xoverdayîşî ruhêko newe awan kerd. Têgêrayîş, reyna agêra serê xeta 14’ê Temmuze. Têgêrayîş nika Xakurkê, Serhed, Amanosî, Amed, Botan û her ca de çarçewaya na felsefe de rayra şino. Do qetîyen bi na felsefe zî bi ser bikewo.

‘AKP-MHP Vîsta Peyêne de yo’

Senî ke çew nêşi serê cenazeya Kenan Evrenî, gama ke hukmatê AKP’yî zî bin kewt wa o zî bi heman hawayî şiro serê sergoyê tarîxî. Ma dewrêkê winayênî de yê. Na yewe ra dişmen bi hawayêkê barbarî hêriş keno, dişmen tenge de mendo, tewa mergî girewta. Cesaret û fedakarîya embazan ê zîndanan bi xoverdayîşê tewr peyênî ramot ke bi nê ruh û fedakarîye ma eşkenê faşîzmî bin fînê. Faşîzm do bi ruhê 14’ê Temmuze bin bikewo. Faşîzm do bi çalakgerîya embaz Kemal Pîrî bêro binfînayene. Faşîzm do bi PKK’yî, bi ruhê PKK’yî, bi felsefeya Rayberîye bêro binfînayene. Pasîfîzm merdiman kişeno. Xonamitişê hemverê faşîzmî do bibo sebebê mergî. Ganî şarê ma na babete de hîşyar bo. Nêkewo halêkê winayênî. 12’ê Êlule de zîndanan de çi îşkence xoverdayoxan rê ameyêne kerdene, ewro heman îşkence hemverê şarî de yeno kerdene. Nêverdanê merasîmê embazanê ma yê şehîdan zî bêro viraştene. Zextêko giran yeno kerdene. Çunke şarî ra terseno, xoverdayîşê şarî ra terseno. Azadîye ra terseno, zano ke do mergê înan bo.

Ma do bi hawayêkê rastî şehîdanê xo rê wayîr vejîyê, bi hawayêkê rastî şehîdgeyanê xo rê wayîr vejîyê, çeqikêka tewr qijkeke do peynîya înan bîyaro. Ma reyna sere de şehîdanê 14’ê Temmuze, heme şehîdanê xo bi vîr anê. Tewr peynî de şexsê embazî Helmet, Şahîn û Devranî de ma heme şehîdanê şorişî bi vîr anê. Ma do hemleya ‚Faşîzmî birijnê, Kurdistanî azad bikerê‘ aver berê, faşîzmî bin fînê û Kurdistanî azad bikerê.“