Onlu: Ganî ma bingeyê hemparî bikerê wareyo cimatkî

Hetkarê hemserekê pêroyî û mesuldarê organîzasyonê HDP’yî Alîcan Onluyî, vat ke HDP’yî 7 serranê peyênan de rixmê heme hêrişan de, bingeyê mucadeleyî xurt kerdo û wina vat: “Ganî ma hendî nê bingeyê hemparî bikerê wareyo cimatkî û xurt kerê.”

Organîzasyonê Partîya Şaran a Demokratîke (HDP), bi amacê modelê dewrê neweyî yê organîzasyonî vejê werte 7 herêmanê Tirkîya de konferansê herêman viraştî. Her konferansî de problem û persê herêmanê xoseran ameyî munaqeşekerdene. Derheqê xebatanê organîzebîyayîşê neweyî de ercnayîş û pêşnîyarîyî ameyî kerdene.

 Hetkarê hemserekê pêroyî û mesuldarê Organîzasyonî yê HDP’yî Alîcan Onluyî vat, „Ganî ma hendî nê bingeyê hemparî bikerê wareyo cimatkî. Ma çarçewaya xebatanê organîzebîyayîşî de 7 herêman de konferansî viraştî û do 3’ê Tebaxe de konferanso merkezî bêro viraştene.“

 Onluyî ard ziwan ke HDP‘yî dimayo ke xomîyan de û tîfaqanê xo dir munaqeşe kerd, çarçewaya organîzebîyayîşî de dest bi kombîyayîşan kerd û vat, „Kurdistan û Rojakewtena Mîyanêne de qewimîyayîşî benê, halo cimatkî, îqtîsadî vurîya. Şekl û şemalê her çîyî vurîya û nê prosesî de ke her çî vurîya lazimî bi organîzebîyayîşêk û metodêkê neweyî estbî. Tirkîya 90 serrî yo ke bi hişmendîya yewperestîye yena rayraberdene. Bi nê îqtîdarî înan waşt ke nê çîyî hîna bikerê zêde. Rejîm wazeno ke cimatbîyayîşî tasfîye bikero. Yan tecîr keno yan zî perçe keno.“

 Onluyî da zanayene ke HDP wazeno bi paradîgmaya xo newe ra xo organîze bikero û xurt bikero. Onluyî ard ziwan ke HDP do xo newe ra goreyê îhtîyacîyanê cimatkî, sîyasî û îqtîsadîyan awan bikero.