Pinheiro: Roniştoxê Efrîn û Serêkanîyê bedelanê giranan danê

Serekê Komîsyonê Cigêrayîşî yê Sûrîye yê Xoserî yê Mîyanneteweyî Pinheiroyî îfade kerd ke Îdlîb de pêro terefî sûcê şerî kenê. Pinheiroyî bale ante sûcanê HTŞ û SMOyî ser.

Roniştişanê Heqanê Merdiman ê 44. yê Konseya Heqanê Merdiman a Neteweyanê Yewbîyayeyan (NY) de binpaykerdişê heqanê merdiman ê Sûrîye bi taybetî Îdlîb ameyî ercnayene. Komîsyonê Cigêrayîşî yê Sûrîye yê Xoserî yê Mîyanneteweyî raporê xo yê 29 rîpelan ê Îdlîbî pêşkêş kerd. Serekê Komîsyonî Paulo Sergio Pinheiroyî bale anete sûcanê şerî yê na herême ser.

Pinheiroyî ard ziwan ke bi mîlyonan sivîlî hema zî herêmanê ke binê kontrolê Heyet Tehrîr El Şamî (HTŞ) de ciwîyenê û wird terefê Îdlîbî zî sûcê şerî kerdî.

Pinheiroyî vat: ''Hêrişê hewayî vera başûrê Îdlîbî û rojawanê Helebî ameyî kerdene. Herême de seba sivîlan cayêk nêmend. Têna 3 mengan de rîyê sûcanê şerî ra mîlyonêk merdimî ca û wareyê xo ra bîyî.''

Pinheiroyî bi taybetî bale ante sûcanê şerî yê HTŞyî ser ke dewleta tirke paştî dana HTŞyî û vat: ''HTŞyî rojnamegerî zî tede muxalîf û sivîlî qetil kerdî. Na rêxistina terorî keyeyî talan kerdî, heman wextî de komê cîyayî yê çekdarî yê herême vera domananê kênayan û cinîyan sûcê şerî kerdî.''

Pinheiroyî dima zî derheqê sûcanê şerî yê dewleta tirke yê vera Efrîn û Serêkanîyê de qisey kerd û vat: ''Sivîlanê herêmanê Efrîn û Serêkanîyê destê Artêşa Mîllî ya Sûrîye ra zaf dejî antî û bedelê giranî dayî.''

Pinheiroyî Konseya Ewropa ra waşt ke hetkarîya şarê Sûrîye bikera û vat: ''Cinî, camêrd, domanê Sûrîye vera janî xo ver danê û hewceyê înan pê hetkarîye esto.''