'Yildirim pê îşkenceyî hêdî-hêdî ame mirnayene'

Cinîya Zulfu Yildirimo ke zîndan de ame qetildene, Asli Yildirim vat: ''Mêrdeyê mi verê zîndanî zî tim raştê zextê ameyêne. Rayêk 57 rojî îşkence de mend û dima ra mezgê ci de tumor vejîya. Pîya bi îşkenceyî rewşa ci zî giranêr bîye.''

Tepişteyo nêweş û astengdar Îbrahîm (Zulfu) Yildirimo ke tehlîyeyê ci rê 10 rojî mendbî Zîndanê Xarpêtî de 13ê tebaxe ame qetilkerdene. Yildirimo ke rixmê nêweşî û astengdarîya xo vera nêdîyayêne, çimêkê ci kor bibi û çimê ci yo bîn zî se ra 49 dîyêne. Yildirim 2011 de çarçewa operasyonanê 'KCK'yî de bi îdîaya 'endamîya rêxistine amebi tepiştene û qaşo 25ê tebaxe de do biameyêne veradayene.

 Yildirim zîndan de pê kanserî kewt û nê prosesî de 3 reyî amelîyet bi. Yildirim zîndan de krîzê qelbî zî derbaz kerd.  Yildirimo ke se ra 96 astengdar bi Zanîngehê Firatî yê Xarpêtî ci rê raporê 'eşkeno zîndan de bimano' dabi.  Yildirim rixmê nêweşîya xo zî hucreyê yewkesî de tepişîyayêne. Îdareyê Zîndanî îdîa kerd ke Yildirimî krîzê qelbî ra wefat kerdo.

Cenazaya Yildirimî dewa Weraniçî ya Dêrsimî de ameye definkerdene. Cinîya ey Asliye Yildirim derheqê babete de ajansê Mezopotamya rê qisey kerd. 

Asli Yildirim da zanayene ke keyeyê înan tedaya dewlete ra serranê 90an de dewe ra bi zorî amebi vetene û vat: ''Mêrdeyê mi zaf reyî ame destbendkerdene û 13 serrî qedexe ra nêeşka bikewo dewe. Ma zaf dî. Pêro cîrananê ma dewe ra bar kerdbi, têna ma mendbî. Leşkeran ma rê gef wend vat 'Eke şima dewe ra nêvejîyê, ma do şima bivêşnê.' Ma neçare mendî ke dewe ra vejîyê.''

Yildirime pare kerd ke lajê înan Devrîm Yildirim 1999 de refanê PKKyî de şehîd bîyo û ê wextî ra dima tedaya vera înan zî zêdîyaya. Yildirime vat: ''Ma bi zorî cenaza girewte la înan nêverda ma biewnê cenaza ra. Seba ke mi cenaza nêdîye mi rê seke lajê mi nêmerdo. Ez hema zî rayîrê ey pawena. Şehadetê lajê mi ra dima mêrdeyê mi bi hedef. O bi serran ame îşkencekerdene. Rojêke reyna mêrdeyê mi ame destbendkerdene û 57 rojî  binê îşkenceyî de mend. Wexto ke agêrîya didanê ci şikîyaye bîyî. Doktorî vat îşkenceyî ra mezgê ci de tumor vejîyayo. O seba tedawî şîyêne Îstanbul û Anqara. La no 5 serrî yo zîndanê Xarpêtî de nêame tedawîkerdene.  Cayê ci zîndan nêbi.

Ma hende muracat kerd la mêrdeyê mi vera nêdîya. Depe de doktor çin o, ma waşt wa nêerşawîyo Zîndanê Xarpêtî la dozgerî qebul nêkerd. Îdareyê Zîndanî ma rê telefon kerd vat mêrdeyê mi merdo. Gelo Xarpêt de çewî dayo piro, kaş kerdo, se kerdo pê? Domananê mi cenaza arde, berde cemxaneyî. Çend saetî mêrdeyê mi nêweşxane de mendo. Eke yewî ma ra bivatêne ma zî şîyêne verê nêweşxaneyî de pawitêne. Vanê o saete 22.00 de merdo la ez pê bawer nêkena.''

Yildirime pê hesna ke aye tewr peyên 9ê tebaxe de pê telefonî mêrdeyê xo de qisey kerdo û vat: ''10 rojî mendbî ke o bêro veradayene. Tay doman û tornê mi teberê welatî de yê. Ey mi rê vat 'Ez panc serrî yo tornanê xo nêvînena, vaje wa bêrê ke ez înan bivîna.' Lajê mi tornê mi ardî. Roja çarşemeyî pêvînayîşo akerde est bi. Mêrdeyê mi vat 'Ez ha mirena. Ti zerrîweş a ke tornanê xo vînena. Ez do nêvîna.' Mi vat ke 'To 5 serrî qedînayî, 10 rojî mendî. Tay sebir bike ti do bivînî.' Ey hîs kerdo ke bimiro. Ey tornê xo zî nêdîyî.''

Asli Yildirim peynîya qiseykerdişê xo de vera selahîyetdaran nêrazîbîyayîşê xo mojna û vat: ''Her çi mîyanê lapanê Erdoganî de yo. O bi xo wina vano. Ganî şar seba tepişteyanê nêweşan vengê xo bikero. Ganî selahîyetdarî zî vajê 'hînî bes o.' Eke wina dewam bikero ma do hema zaf xebera mergî bieşnawê.''