Avûkatê norwêçijî Bent Endresenî ANFyî rê derheqê tecrîdê vera Rayberê Şarê Kurdî Abdullah Ocalanî de qisey kerd.

Endresenî pare kerd ke ey zaf reyî meseleya kurdan ser o Tirkîya zîyaret kerda û vat: ''Hayîya mi şert û mercanê tepişîyayîşê Ocalanî est a. Nê şertî bi temamî îlegal ê. Babeta tecrîdî de xeylêk çîyî est ê ke merdim eşkeno vajo. Babeta şertanê tepişîyayîşê Ocalanî de perso esas o yo ke ganî vera tecrîdî çi bêro kerdene. No pers derheqê xîretanê sîyasîyan ê Tirkîya de yo zî. Tecrîdê zîndanan nêno qebulkerdene.

Komel û dezgehê Ewropa vera zehmetîyanê sîyasîyan ê Tirkîya çîyêkî nêkenê. Perso esas no yo ke çira Ewropa tewirêko winayên mojneno? Sebebê ney zanîyeno. Polîtîkayanê multecîtîye ra Ewropa tedaya Tirkîya nêkena. Çarçewa bazarîye de destûr nêdîyeno kerdişanê Tirkîya.''

Endresenî îfade kerd ke wextê peyênî de xeylêk merdimî vera meseleya bi mesuldarî têgêrenê, aktîf bîyê û vat: ''Vera qirkerdişê Xeze têgêrayîşê girîngî est ê. Têkoşînê seba bindestan do dewam bikero. Ez paştî dana tepişteyanê sîyasîyan ê Tirkîya û şarê kurdî ke Kurdîstan de teda vînenê. Şert û mercê tepişîyayîşê Ocalanî nimûneyêka tedaya vera kurdan a.''