Heyetê Rayberdişê Merkezî (MYK) yê DEM Partî badê xespkerdişê şaredarîya Esenyurtî banê partîye yê Esenyurtî de kombîyayîş kerd. Hemsereka Pêroyî ya DeM Partî Tulaye Hatimogullari badê kombîyayîşî verê banê qeza de eşkerayîye daye.

Tulaye Hatimogullari ard ziwan ke ê zaf hole rejîmê qeyûmî sarisnenê û nê vatî: ''Çunke no rejîmê qeyûmî sere de bajarê kurdan û weçînayoxê kurdî vera heme kesanê  ke demokrasî wazenê ame caardene. Qeyûman verî şaredarîyanê HDPyî de staj kerd, dima unîversîteyan de û dima ra sazgehê ke kêfê înan tede nîno tira ame vilakerdene. Ma verî zî tim vatêne ke ganî vera qeyûm vengo xurt bêro vetene ke verê ci bêro girewtene. Werîkna ma heqdar nêbînê la çi heyf ke sey ma vejîya. Seba ke her kes bi xurtî vera qeyûman nêvejîya ewro rojawanê Tirkîya de zî qeyûm yeno caakerdene.

Ewro şaredarîya Esenyurtê Îstanbulî ke şaredarê ci hetê bawerî û şaranê cîya cîyayan ra ameyo vîjnayene ameya xespkerene. Îqtîdarê ke tehemulê yewîya şaran nêkerd bi operasyonê şefeqî derbe daye îradeyê şarî ro. Qeyûm rejîmê darbe yo. Qeyûm xespkerdişê îradeyê şarî yo.Ewro çîyo ke serek Ahmet Ozerî rê bîyo vera îradeyê şarê Esenyurtî bîyo. No qeyûm semedê ma bêhukm o. Ahmet Ozer anorê nê komelî yo. O akademîsyenêk o, o merdimêko zanist o û hetê îradeyê şarî ra ameyo vîjnayene. Qesre çîyo ke bi vîjnayîşî nêeşkena bifîno dest kena ke bi qeyûman bigîro.

Ma tim vera rejîmê qeyûmî yê. Înanê ke qala haştîye kerdêne, vatêne 'haştîya zereyî' vizêr bi operasyonê Esenyurtî derbe daye haştîye zereyî ro. Xora yewîya şaran a Esenyurtî haştîye bi xo ya. Ê ke hêrişê yewîye û îradeyê şarî kenê senî eşkenê qala haştîye bikerî, ez hesabê nê vîjdanê şaranê Tirkîya rê verdena. Seba ke siba şaredarîye bînî zî nêrê destsernayene ganî ma pêro bibê yew. Inkey wextê yewîye yo. Wextê ci yo ke ma pêro pîya haştîya komekî biwazê.''

Tulaye Hatimogullari pîya bi partijîjan badê eşkerayîye şîyî Meydanê Esenyurtî.