Goreyê raporê Komeleya Cinîyan a Starî ya Wanî mîyanê di serranê peyênan de şaristan de 2023 de 23 cinîyî hetê camêrdan ra ameyî qetilkerdene û 6 cinîyan zî ''xo kişto.'' Wan de menga nîsane de zî xeylêk cinîyî bi hawayêkê ''şikdarî'' merdî. 

Wekîla DEM Partî ya Wanî Gulcane Kaçmaz Sayyîgît derheqê babete de ANFyî rê qisey kerd. Gulcane pare kerd ke Wan de meseleyê cinîyan her ke şinê zêdîyenê. 

Wekîla DEM Partî ya Wanî Gulcane îfade kerd ke ke kişîyayîşê cinîyan bi hawayêkê hîrayî nênê cigêrayene û bi vatişê ''xokiştişî'' yenê nimnayene.

Wekîle Gulcane vat: ''Bi taybetî serranê peyênan de qeydê merganê şikdaran û xokiştişan zêdîyayî. Şîdetê vera cinîyan her warê cuye de xo mojneno ra. Nê atnosferê sîyasîyî de cîyakerîya mabênê cînsîyetan zêdîyaye û xîret yeno kerdene ke serdestîya camêrdan xurt biba. Naye ra şîdet hîna zaf yeno dîyene. Bi taybetî polîtîkayê bêcezaverdayîşî û kulturê cuye wayîrê şîdetî vejîyenê. Seba ke Peymana Îstanbulî ameye betalkerdene zî şîdet zêdîya. Şîdetê vera cinîyan û qirkerdişê cinîyan serebûtanê edlîyan ra zafêr bîyê babetêka polîtîke.''