Vervatoxa DEM Partî Ayşegule Dogan derheqê rojdemî de merkezê pêroyî yê partîya xo de eşkerayîye daye. 

Ayşegule Dogan vera destsernayîşê Şaredarîya Esenyurtî nêrazîbîyayîşê xo mojna û vat: ''Ma pêro qeyûman rê vanê ney. Wexto ke Colemêrgî rê qeyûm ame tayînkerdene ma vat ke no kerdiş do vila bibo. Vizêr zî Esenyurtî rê qeyûm ame tayînkerdene. Teyna Şaredar Ahmet Ozer ney pêro şarê Esenyurtî raştê nê hêrişî ame. Wazenê mesajê xo bidê Pêkerdişê Şaristanan û Îstanbulî. Ganî ma pîya wurzê payan ser, îtîraz bikerê û xo ver bidê. Îqtîdar nêwazeno ke muxalefeto demokratîk xurt bibo.Ganî ma ney bipersê ke çira Şaredarîya Esenyurtî û şaredarê ci? Îqtîdar keno ke bi nê operasyonan muxalefetî teng bikero.

Erdoganî tayê çîyî vatî. La ganî Erdogan nê terzê xo ra fek vera bido. Seba ke kurd o şaredarê Esenyurtî tepişîyeno. No nêno qebulkerdene. No teyna DEM Partî û CHPyî zî eleqedar nêkeno. Hedefkerdişê şaredaran hedefkerdişê şarî yo. 

Sey DEM Partî ma kayanê îqtîdarî vînenê. Ma do bi nê kayan nêxapîyê. Erdoganî vizêr vatbi ke eke huqûq çin bo edalet zî do çin bo. La qeyûman tayîn keno. Polîtîkayê înkar, çinhesibnayîş, asîmîlasyon û asayîşî berdewam ê. Haştîya komelkî, pêkerdiş û dîyalogan çin a. No samîmîyet nîyo.

Bahçelîyî vato ke muxatabo esil Birêz Ocalan o. Ganî tecrîdê Îmraliyî wedarîyo. Teyna Erdogan û Bahçekî qisey kenê. Sewbîna têgêrayîşêk çin o. Babeta çareserîya demokratîke ya meseleya kurdan de muxatab dîyar o ke o zî Birêz Ocalan o. Ma hêzêko rêxistinkerde yê. Partîya ma wayîrê tewirê xurtî yê.''