Iraqî de nawnayîşê vera hukmatî yê ke 1ê teşrîna verêne de dest pêkerd her çiqas serekwezîrî îstîfa kerd zî hema dewam kenê. Destpêkerdişê nawnayîşan ra hewteyêk ra dima dewleta tirke Rojawan îşxal kerd. Dima zî DAÎŞo ke Iraq û Başûrê Kurdîstanî de newe ra bi aktîf, dest pê hêrişê pêşmergeyan, asayîşî û artêşa Iraqî kerd.

Cerganê DAÎŞî şaristananê Musul, Kerkuk, Anbar, Telafer, Tîkrîtî yê Iraqî de û şaristananê Xaneqîn, Kîfrî, Kelar, Xurmatu, Dîyala û Celavla yê Başûrê Kurdîstanî de hêrişê hêzanê pêşmergeyan û asayîşî kerd.DAÎŞo ke hêrişê Gullecoyê Kîfrî kerd, perey Celavla de hêrişê artêşa Iraqî kerd û şewa bîne zî hêrişê hêzanê pêşmergeyanê Gullecoyî kerd. Vizêr şewe saete 21:00î de hêrişê DAÎŞî yê vera Tugaya Pêşmergeyan 3 pêşmergeyan wefat kerd û 2 pêşmergeyî zî birîndar bîyî. Wezaretê Pêşmergeyan zî no hêriş rast kerd.

Hêrişê Vera Qerargehê DYA

DAÎŞ vera qerargehanê DYA yê Iraqî dest pê hêrişanê bi roketan kerd. Şewa bîne qerargehê DYA yê şaristanê Enbarî Ayn El-Esed bi hedefê hêrişan. Hêriş de 5 roketî rastê qerargehî ameyî. Derheqê zerarê madîyî û mergî de hema zî eşkerayîyêke nêameye kerdene. Vizêr şewe zî vera qerargehê DYA yê şaristanê Selahadînî Beled bi hêrişo bi roketan amekerdene. Hêriş de 2 roketê Katyuşa rastê qerargehî ameyî. Goreyê zanayîşo ke çimeyanê leşkerî ra ameyî girewtene, Qerargehê Leşkerî yê Beledî ser o di roketî ameyî panayene û hêrişan de zerarêk nêresa kesêkî.