Derheqê Hemserekê Verêne yê HDPyî Selahattîn Demîrtaşî de yo ke 3 serran ra nata Zindanê Biasayîşê Berzî yê Tipê Fyî yê Edîrne de maneno ame îdîakerdene ke semedê dejê sêneyê xo û tengîya nefesî ra hewteyêk ra dima reyna sewqê Nêweşxaneyê Zanîngehê Trakya bi.

Ame vatene ke Demîrtaş vizêr şan saete 18:00 de zindan ra sewqê nêweşxaneyî bi û hetê cendirmeyan ra dormeyê nêweşxaneyî de tedbîrê asayîşî yê xurtî ameyî girewtene.

Nê xeberan ser o HDPyî hesabê xo yê twîtterî de eşkerayîyêk kerde û vat: "Ewro saete 17:30 de beşê gastrolojîyî de tetkîkê Demîrtaşî yê ke temam nêbîyî ameyî kerdene û 19:00 de zî agêra zindanî. Mabênê saetanê 20:00-22:00 de Demîrtaşî avûkatanê xo reyde pêvînayîşêk kerd. Rewşa pêroyî ya Demîrtaşî baş a. Xeberê ke yenê kerdene raşt nîyê."