7ê tebaxa 2019î ra nata Rayberê Şarê Kurdî Abdullah Ocalanî reyde pêvînayîşî nênê kerdene. Hemserekanê HDPyî yê Amedî Zeyat Ceylan û Hulya Alokmen Uyanik tecrîdê vera Rayberê Şarê Kurdî Abdullah Ocalanî ercna.

Hemserekê HDPyî yê Amedî Zeyat Ceylanî vat: "Tecrîdê Îmraliyî û nêçareserkerdişê mesela kurdî pabesteyê yewbînan ê. Nêzdîbîyayîşê îqtîdarî û dewlete yê vera kurdan bi xo tecrîd anê meydan. Wexto ke Birêz Ocalanî reyde pêvînayîşî ameyêne erdene û vengê ci ameyêne eşnawitene komelê Tirkîya û Kurdîstanî hîna asan bîyî. Heyf o ke her çiqas Birêz Ocalanî çend xîret kerd zî hukmat û dewlete xo prosesê haştîye ra dûr gênê û nêwazenê mesela çareser biba. Bi nê hawayî hukmat wazeno wa kaos dewam bikero ke bedelê ci zî şarê Tirkîya û Kurdîstanî danê. Îtîfaqê AKP-MHPyî bi tecrîdî keno ke şarî şer qebul bikê. Îtîfaqê şerî çîyêk nêdano şaran. Têna destê înan de înkarkerdiş û şer esto. Seba naye krîzê ekomokî û demokrasîyî her ke şono beno xorîn. Seba ke Tirkîya de aramî, haştîye û demokrasî bibê teqez ganî tecrîdê Ocalanî ser o bêro wedaritene.

Hemsereka HDPyî ya Amedî Hulya Alokmen Uyanik vat: "Mesela kurdî kilîdê meselanê Rojhelatê Mîyanênî ya û kilîdê çareserîye Ocalan o. Pêvînayîşanê Birêz Ocalanî de rayîrê bînî amebî akerdene. Labelê weçînayîşanê 31ê adara 2019î ra dima sîstem rijîya, bi înkarkerdişî şer newe ra dest pêkerd. Wexto ke tecrîd beno xorîn tesîrê ci sîyaset û komelî ser o zî benê. 20 serr ê ke Birêz Ocalan binê tecrîdî de yo. Mesela kurdî pabesteya Birêz Ocalanî ya. Eke mesela kurdî çareser nêba Rojhelatê Mîyanênî de kesêk zî nêeşkeno asan bibo. Wexto ke Birêz Ocalanî reyde pêvînayîşî ameyêne kerdêne Kurdîstan û Rojhelato  Mîyanên asan bîyî. Tirkîya têna bi sereyê xo nêeşkena tecrîd xorîn biko û mîyanê nê karî de hêzê mîyanneteweyî zî estî. Seba naye zî tecrîd mîyanneteweyî yo. Seba ke şarê Kurdîstanî wayîrê statûyêk nêbo tecrîd kenê xorîn."