Kakabavehe: Vera qeyûman ganî ma wurzê payan ser

Parlamentera sosyalîste Amînehe Kakabaveh îfade kerd ke nêrazîbîyayîşo ke vera îşxalê Rojawanî yeno mojnayene ganî vera qeyûman zî bêro mojnayene û vat, ganî kurdî û dostê înan ê Tirkîya, Kurdîstan û Ewropa de vera qeyûman wurzê payan ser.

Parlamentera Sosyalîste ya Swêdî Amînehe Kakabaveh derheqê hêrişanê dewleta tirke yê vera Rojawanî û xespê qeyûman ê Vakurê Kurdîstanî de ANFyî reyde qisey kerd.

Kakabavehe ard ziwan ke hukmatê Erdoganî û AKPyî bi tayînkerdişê qeyûman heqê weçînayîşê merdiman wedarit û ganî kurdî û hêzê mîyanneteweyî vera naye bêveng nêmanî.

Kakabavehe bale ante girîngîya têkoşînê vera qeyûman ser: "Şarî rayê xo xebitnayî îdareyê xo weçîna. Hukmatî zî bi sucdarîyanê bêbingeyan weçineteyî wezîfe ra dûrî visnayî û herinda înan de merdimê xo tayîn kerdî. Sere de kurdî ganî her kes vera naye nêrazîbîyayîşê xo bimijno. Mi babeta qeyûman verê cû arde rojdemê Parlamentoyê Swedî û ez do newe ra bîyara rojdemê ci."

Kakabavehe Swêd û welatê Ewropa rexne kerdî ke ê vera qeyûman nêrazîbîyayîşê xo pêşkêş nêkenê û vat: "Oyo ke vera ci hêriş yeno kerdene demokrasîyê herême yo. Qedînayîşê destkewteyanê şaredarîyan û meclîsanê pêroyînan ê şaristanan ganî nêrê qebulkerdene û vera nînan ganî xoverdayîşêko pîl bêro mojnayene."

Kakabavehe pare kerd ke dewleta tirke bi îşxalê Rojawanî wazena YPG û YPJ çin bika û bi qeyûman zî wazena ke HDP çin bika û vat: "Ganî welatê Ewropa û hêzê çepî û demokratîyî yê Ewropa naye bivînê. Vera nînan xo ver bidê. Heta ke no nêro kerdene Erdogan do hêrişanê xo dewam biko."