Prof. Fîncanci: Xoverdayîş heq o

Sereka TÎHVî Fîncanci ard ziwan ke xoverdayîş heq o û ganî xoverdayîş û paştdayîş bêrê pîlkerdene. Fîncanci vat: "Ganî ma polîtîkaya tersnayîşî çin bikerê û bi cesaretî verê nê kesanê ke wazenê ma bitersnê vinderê."

Sereka Pêroyî ya Weqfa Heqanê Merdiman a Tirkîya (TÎHV) Prof. Dr. Şebneme Korur Fîncanci bi wesîleya Hewteyê Heqanê Merdiman ANF reyde qisey kerd.

Prof. Fîncanci ard ziwan ke rêzo destpêk ê binpaykerdişê heqanê merdiman de çinkerdişê heqê nawnayîş ê haştîyaneyî û demokratîkî esto û kesê ke xîret kenê qisey bikerê bi teda û îşkence yenê tepiştene. Fîncanci bale ante ser ke eke rewşe wina dewam bika welat de keso ke nêame tepiştene nêmaneno û vat: "Ma mîyanê prosesêkê hesasî de yê. Her serre qasê 200 hezar merdimî yenê tepiştene. Coka babete binpaykerdişê heqan de gefo ke zindanan ro yeno wendene rêzê destpêkî de yo."

Fîncanci da zanayene ke tedaya vera cinîyan zêdîyay û vat: "Bitaybetî prosesê dîyalogî de ke çekî bêveng bîyî û rewşêka haştîyane estbî şîdetê camêrdan ê vera cinîyan se ra 200 kêm bi labelê nika newe ra se ra 300 bi zêde." Fîncanci destsernayîşê şaredarîyanê HDPyî vist vîrî û vat ke asan nîyo ke çew mîyanê nê şert û mercan de behsê estbîyayîşê demokrasîyî bikero.

Sereka TÎHVî Prof. Şebnem Korur Fîncanci vat: "Serranê peyênan de ma vanê wa bindestî bibê yew. Paştdayîş û xoverdayîşê bindestan ra ber rayîrêkê vurnayîşî çin o. Beyannameyê Heqanê Merdiman de yeno vatene eke dewletê ke benê sedemê binpaykerdişê heqanê merdiman estbê o çax xoverdayîşê vera înan heq o. Coka ganî xoverdayîş û paştdayîş bêrê xurtkerdene. Hêzê demokrasîyî û kede neçare yê ke têkoşînê yewbînan pîl bikerê. Se vanê wa vajê ma xurtêr ê. Polîtîkayêka tersnayene esta ganî na polîtîkaya tersnayîşî bêro teriknayene. Ganî ma vera nê kesanê ke wazenê ma bitersnê wurzê payan ser."