17 û 18ê kanûne de rayberîya Neteweyanê Yewbîyayeyan de Forumê Multecîyan şaristanê Cenevre yê Swîsî de do bêro kerdene. Seba forumî venga Serekkomarê Tirkî Recep Tayyîp Erdoganî ame dayene ke no bi sebebê nêrazîbîyayîşan.

YJK-S û CDK-Sî eşkerayîyêka hempare weşanaye û pare kerd ke no zîyaret nêno qebulkerdene. Eşkerayîye de ame vatene: "Erdoganî û partîya koalîsyonê ci MHPyî vera kurdan şer kerd. Bi hezaran merdimî ameyî tepiştene û bi hezaran merdimî zî neçare mendî ke koç bikê. Bi hezaran sîyasetmedarî, aktîvîstê heqanê merdiman, şaredarî, serekê partîyan, hemserekî, akademîsyenî û aktîvîstê heqanê merdiman ameyî tepiştene û bi seyan keî ameyî kiştene."
Her di rêxistinan îfade kerd ke polîtîkayê hukmatê tirkî wextê awanbîyayîşê ci ra çinkerdişê şaran ser o yê û qirkerdişê armenîyan û barbarîyê Sûr-Cizîr-Nisêbînî ameyî vîrvistene.

YJK-S û CDK-Sî îşxalo ke 9ê teşrîna verêne de vera Vakur û Rojhelatê Sûrîye dest pêkerd vist vîrî û da zaneyene ke nê îşxalî de vera merdimîye hetê dewleta tirke ra sucê şerî ameyî kerdene. Eşkerayî de ame vatene: ‘‘Erdogan multecîyan vera Ewropa sey hacetî xebitnenê û bi nê hawayî bi mîlyonan Euro pere girewtî. La nê pereyan seba şerî xebitnenê. Bêvengîya vera binpaykerdişê heqanê merdiman û sucanê şerî yê rejîmê Erdoganî yena manaya hemkarîya ci. Seba ma çîyo ke yeno qebulkerdene no yo ke Neteweyanê Yewbîyayeyan û Swîsre seba sucanê ci yê şerî venga Erdoganî da.‘‘

Eşkerayîye de ame vengdayene ke seba şermezarkerdişê na rewşe 17ê kanûna 2019î de saete 11:00 de verê bînaya Neteweyanê Yewbîyayeyan a Cenevre de çalakîyêke do bêra kerdene û ganî her kes beşdarê ci bibo.