7ê tebaxa 2019î ra nata Rayberê Şarê Kurdî Abdullah Ocalan reyde pêvînayîş nêno kerdene. Serekê Şaxê Êlihî yê Komeleya Heqanê Merdiman Devran Yildizî tecrîdê Îmraliyî ercna.

Yildizî ard ziwan ke Tirkîya Zindanê Îmraliyî seba polîtîkayanê kerd sey hacetêk û vat: ''Tirkîya Zindanê Îmraliyî de goreyê huqûqê xo yê zereyî tênêgêrena. Goreyê huqûqê ci kam çi suc keno wa biko eşkeno avûkatan û keyeyanê xo reyde pêvînayîş biko. Polîtîkayê hukmatî yê Îmraliyî binpaykerdiş ê. Ocalan kilîdê haştîye û aramîya Tirkîya yo. Tecrîdkerdişê Ocalanî Tirkîya ser o tesîr keno. Her ke şono no tecrît pêro welat de vila beno.

Wexto ke Ocalanî ser o tecrîd beno xorîn hêrişê vera kurdan zî beno çetin. Hêrişê vera Rojawanî dewam kenê. Zaf şaredarîyê HDPyî ameyî xespkerdene. Semedo bingeyîn ê tecrîdî zî şer o. Hukmatbi metodê şerî wazeno haştîye çin biko. Naye ra dormeyê Tirkîya de kesêk nêmend. Tirkîya bi nê hêrişê îşxalî zere û teber ra girewte ya. Têna Birêz Ocalan eşkeno nê rayîrê girewteyî abikero. Rayîrê haştîye Îmrali ra derbaz beno. Eke tecrîd bêro wedaritene no do bibo hemleya tewr girînge û verên o.

Ganî qedexeyê pêvînayîşî bêro wedaritene. Peymana Heqanê Merdiman a Ewropa, Peymana Heqanê Medenîyan û Sîyasîyan a NYyî û huqûqê Tirkîya tecrîd bi temamî qedexe kerd. Verî ke grevê vêşanîye qedîyayî bi çend rojan Komîteya Vergirewtişê Îşkenceyî (CPT) şîye Îmrali û o çax Wezaretê Edaletî eşkera kerd ke qedexeyê pêvînayîşanê keyeyan û avûkatan ame wedaritene. Seba ke dewlete zanena ke CPT do cigêrayîş biko goreyê ci têgêraye. Verê cû CPT amebi Êlih zî. Hayîya pêro komele û dezgahan pê estbî la ma nêzanayêne ke amebi. CPT pêvînayîş keno la raporê xo eşkera nêkeno. Coka hetê têgêrayîşî ra qels o û rolê xo tam nêano ca. Kesêk zî bêterefgîrîya ci ra bawer nêkeno."